പ്രമുഖ വാഹന നിർമ്മാതാക്കളായ ടാറ്റ മോട്ടോഴ്സ്, എസ്‌യുവി ഡിസൈനിൽ ഒരു പുതിയ യുഗം നിർവചിച്ചുകൊണ്ട് ടാറ്റ കർവ്വ് ഐസിഇയും ഇവിയും അവതരിപ്പിച്ചു. ഇന്ത്യയിലെ ആദ്യത്തെ എസ്‌യുവി കൂപ്പെയാണ് പുതിയ ടാറ്റ കർവ്. എസ്‌യുവിയുടെ കരുത്തും പ്രായോഗികതയും ഒരു കൂപ്പെയുടെ സൗന്ദര്യവും സ്‌പോർട്ടി ലുക്കും സമന്വയിപ്പിക്കുന്ന വാഹനമാണിത്. വരുന്ന ഓഗസ്റ്റ് 7ന് ലോഞ്ച് ചെയ്യുന്ന ഈ വാഹനം ടാറ്റ മോട്ടോഴ്സിന്റെ ശക്തമായ മൾട്ടി പവർ ട്രെയിൻ സ്ട്രാറ്റജിയെ അടിസ്ഥാനമാക്കിയാണ് രൂപകൽപ്പന ചെയ്തിരിക്കുന്നത്. കർവ്, ആദ്യം ഇവി വേർഷനിലും തുടർന്ന് ഐസിഇ വേർഷനിലും ലഭ്യമാകും.
ഈ പുതിയ മോഡലിലൂടെ മിഡ് എസ്‌യുവി വിഭാഗത്തിൽ ടാറ്റയുടെ ശക്തമായ സാന്നിദ്ധ്യം വീണ്ടും അടിവരയിടുകയാണ്. പെട്രോൾ, ഡീസൽ, ഇലക്ട്രിക് എന്നിങ്ങനെ വിവിധ പവർട്രെയിൻ ഓപ്ഷനുകൾ വാഗ്ദാനം ചെയ്യുന്ന ടാറ്റ കർവ്, ടാറ്റയുടെ മൾട്ടിപവർട്രെയിൻ സ്ട്രാറ്റജിയുടെ മുൻനിരക്കാരനാണ്. ഈ പുതിയ വാഹനം മിഡ്എസ്യുവി ഉപഭോക്താക്കളുടെ വൈവിധ്യമാർന്ന ആവശ്യങ്ങൾ നിറവേറ്റുകയും മികച്ച പ്രകടനവും മനോഹരമായ ഡിസൈനും ഉറപ്പ് നൽകുകയും ചെയ്യുമെന്നും ടാറ്റ മോട്ടോഴ്സ് പാസഞ്ചർ വെഹിക്കിൾസ് ലിമിറ്റഡിന്റെയും ടാറ്റ പാസഞ്ചർ ഇലക്ട്രിക് മൊബിലിറ്റി ലിമിറ്റഡിന്റെയും മാനേജിംഗ് ഡയറക്ടർ ശൈലേഷ് ചന്ദ്ര പറഞ്ഞു.
ആകർഷകമായ രൂപകൽപ്പന, പ്രായോഗികത, മികച്ച പ്രകടനം എന്നിവയുടെ സമന്വയമാണ് കർവ്. മിഡ്എസ്യുവി വിപണിയിലെ സാധാരണ ബോക്സി ഡിസൈനിൽ നിന്ന് വ്യത്യസ്തമായി, ശക്തമായ എയറോഡൈനാമിക് തീമിലാണ് രൂപകൽപ്പന ചെയ്തിരിക്കുന്നത്. ഉയർന്ന റൈഡിംഗ് പൊസിഷൻ, ശക്തമായ ക്ലാഡിംഗ്, ഡൈനാമിക് അനുപാതങ്ങൾ എന്നിവ വാഹനത്തിന് ആകർഷകമായ രൂപം നൽകുന്നു. കുത്തനെയുള്ള മേൽക്കൂര കാറ്റിനെതിരായ പ്രതിരോധം കാര്യക്ഷമമായി കുറയ്ക്കാൻ സഹായിക്കുമ്പോൾ, വലിയ വീലുകൾ, ഡിപ്പാർച്ചർ ആംഗിൾ, വർദ്ധിച്ച ഗ്രൗണ്ട് ക്ലിയറൻസ് എന്നിവ വാഹനത്തിന് മികച്ച ബാലൻസ് ഉറപ്പ് വരുത്തുന്നു. വെർച്വൽ സൺറൈസ്, ഗോൾഡ് എസെൻസ് എന്നിങ്ങനെ രണ്ട് പുതിയ കളർ ഷേഡുകളിലായിരിക്കും ഈ എസ്‌യുവി കൂപ്പെ എത്തുന്നത്.
ദൂരയാത്രകൾ ഇഷ്ടപെടുന്ന ഇന്ത്യൻ കുടുംബങ്ങൾക്കായി പ്രത്യേകം രൂപകൽപ്പന ചെയ്തിരിക്കുന്നതിനാൽ തന്നെ വാഹനത്തിന്റെ ആധുനികവും ലളിതവുമായ ഇന്റീരിയർ ഡിസൈൻ, സ്റ്റോറേജ് സ്ഥലം കുറയ്ക്കാതെ തന്നെ യാത്രക്കാർക്ക് വിശാലമായ ക്യാബിൻ സ്‌പേസ് ഉറപ്പാക്കുന്നു. ക്യാബിനുള്ളിലെ സെഗ്മെന്റ് ഫസ്റ്റ് ഫീച്ചറുകൾ, നിറങ്ങൾ, വസ്തുക്കൾ, ഫിനിഷിങ്ങ് എന്നിവ വാഹനത്തിന് പ്രീമിയം ലുക്കും, പനോരമിക് ഗ്ലാസ് റൂഫ് വിശാലമായൊരു യാത്രയും പ്രദാനം ചെയ്യുന്നു. കൂടാതെ വർദ്ധിപ്പിച്ചതും എളുപ്പത്തിൽ ആക്സസ് ചെയ്യാവുന്നതുമായ രീതിയിലാണ് ബൂട്ട് സ്‌പേസ് ക്രമീകരിച്ചിരിക്കുന്നത്.
പെട്രോൾ, ഡീസൽ ഓപ്ഷനുകൾക്കൊപ്പം മികച്ച ഇൻക്ലാസ് ലോംഗ് ഡ്രൈവിംഗ് റേഞ്ച് വാഗ്ദാനം ചെയ്യുന്ന ഇലക്ട്രിക് വേരിയന്റുകളിലും ടാറ്റ കർവ് ലഭ്യമാവും. വിപുലമായ ഇൻഫോടെയ്ൻമെന്റ് സംവിധാനം, വലിയ സ്‌ക്രീനുകൾ, കണ്ര്രകഡ് കാർ സാങ്കേതികവിദ്യ എന്നിവയാൽ സജ്ജമായ കർവ്, ഈ സെഗ്മെന്റിൽ കേട്ടിട്ടില്ലാത്തതും വിലകൂടിയ വാഹനങ്ങളിൽ നിന്ന് ഉരുത്തിരിഞ്ഞതുമായ നിരവധി സ്മാർട്ട് ഫീച്ചറുകളും ഉൾക്കൊള്ളുന്നു. കൂടാതെ, കർശനമായ സുരക്ഷാ മാനദണ്ഡങ്ങൾ പാലിക്കുന്ന തരത്തിൽ രൂപകൽപ്പന ചെയ്തുകൊണ്ട് ടാറ്റ മോട്ടോഴ്സിന്റെ സുരക്ഷാ പാരമ്പര്യവും ഈ മോഡൽ തുടർന്ന് വരുന്നു.