നല്ല പഞ്ഞിപോലുളള അപ്പവും ഇഷ്ടപ്പെട്ട കറിയും രാവിലെ കഴിക്കാൻ കിട്ടുമെങ്കിൽ എന്ത് രസമായിരിക്കുമല്ലേ? ഏത് കറി വേണമെങ്കിലും നമുക്ക് തയ്യാറാക്കാം. പക്ഷെ മൃദുവായ അപ്പം തയ്യാറാക്കുകയെന്നത് കുറച്ച് പ്രയാസപ്പെട്ട കാര്യമാണ്. കൃത്യമായ അളവിൽ സാധനങ്ങൾ ചേർത്ത് മാവ് തയ്യാറാക്കിയാൽ മാത്രമേ മൃദുവായ അപ്പം ഉണ്ടാക്കാൻ പറ്റുകയുളളൂ. അതിനാൽത്തന്നെ പലരും ഒരു പരീക്ഷണത്തിന് മുതിരാറില്ല. പഞ്ഞി പോലുളള അപ്പം തയ്യാറാക്കാനായി ഒരു കിടിലം വഴി പരിചയപ്പെട്ടാലോ?
ആവശ്യമായ സാധനങ്ങൾ
പച്ചരി, തേങ്ങ ചിരകിയത്, ചോറ്, ഈസ്റ്റ്. വെളളം, പഞ്ചസാര, ഉപ്പ്
ചെയ്യേണ്ട രീതി
അപ്പത്തിനായുളള മാവ് തയ്യാറാക്കുകയാണ് ആദ്യത്തെ ഘട്ടം. ഒന്നര കപ്പ് പച്ചരി നന്നായി വൃത്തിയാക്കിയതിനുശേഷം ആവശ്യമായ വെളളം ചേർത്ത് കുതിർക്കാൻ മാറ്റി വയ്ക്കുക. നാല് മണിക്കൂർ സമയമെങ്കിലും അനുവദിക്കണം. ശേഷം മിക്സിയുടെ വലിയ ജാറിലേക്ക് കുതിർന്നിരിക്കുന്ന പച്ചരിയും നാല് ടേബിൾ സ്‌പൂൺ തേങ്ങ ചിരകിയതും മൂന്ന് ടേബിൾ സ്‌പൂൺ ചോറും, ഒരു ടേബിൾ സ്‌പൂൺ പഞ്ചസാരയും കാൽ ടീസ്‌പൂൺ ഈസ്റ്റും ചേർത്ത് നന്നായി അരച്ചെടുക്കുക.
അരച്ചെടുത്ത മാവിനെ വലിയൊരു പാത്രത്തിലേക്ക് മാറ്റുക. പാലപ്പമാണ് തയ്യാറാക്കാൻ ഉദ്ദേശിക്കുന്നതെങ്കിൽ മാവിൽ പാലൊഴിച്ച് കട്ടി കുറയ്ക്കാവുന്നതാണ്. ആവശ്യത്തിന് ഉപ്പ് ചേർക്കാനും മറക്കരുത്. മാവ് നന്നായി യോജിപ്പിച്ചതിനുശേഷം എട്ട് മണിക്കൂറോളം മാറ്റിവയ്ക്കുക. എട്ട് മണിക്കൂറിനുശേഷം മാവ് ഒരു തവണ കൂടി നന്നായി ഇളക്കണം. ശേഷം വീണ്ടും മാവിനെ ഒരു മണിക്കൂറോളം മാറ്റിവയ്ക്കുക. ഇങ്ങനെ ചെയ്തതിനുശേഷം അപ്പം തയ്യാറാക്കാം. മൃദുവായ അപ്പം തയ്യാറാക്കിയതിനുശേഷം ഇഷ്ടപ്പെട്ട കറിയോടൊപ്പം കഴിക്കാവുന്നതാണ്.