മിക്കവരുടെയും വീടുകളിൽ കണ്ടുവരുന്ന ഒരു പ്രശ്നമാണ് ചിലന്തി ശല്യം. വീടിന്റെ മുക്കിലും മൂലയിലും ചിലന്തി എത്തും. ഇവ കടിച്ചാൽ അലർജി അടക്കമുള്ള പ്രശ്നങ്ങൾ ഉണ്ടാകാനും സാദ്ധ്യതയുണ്ട്. ഗുരുതരമായാൽ മരണം വരെ സംഭവിക്കാം. അതിനാൽത്തന്നെ ചിലന്തിയെ വീട്ടിൽ നിന്ന് തുരത്തേണ്ടത് അത്യാവശ്യമാണ്.

വീട് വൃത്തിയായി സൂക്ഷിക്കുകയാണ് ഏറ്റവും പ്രധാനം. പൊടിയും മറ്റുമായി വൃത്തിയില്ലാത്ത സാഹചര്യത്തിലാണ് പ്രാണികളെയും മറ്റും പിടിക്കാൻ ചിലന്തി എത്തുന്നത്. അതിനാൽ പതിവായി വീട് അടിച്ചുവാരി വൃത്തിയാക്കുക. പൊടിയൊക്കെ കളയുക.

എത്രയൊക്കെ വൃത്തിയായി സൂക്ഷിച്ചിട്ടും ഇടയ്ക്കിടെ ചിലന്തി വല ഉണ്ടാകുന്നുവെന്നാണ് മിക്കവരുടെയും പരാതി. എന്നാൽ അങ്ങനെ പരാതിയുള്ളവർക്ക് അടുക്കളയിലെ ചില സാധനങ്ങൾ ഉപയോഗിച്ച് ചിലന്തിയെ തുരത്താൻ സാധിക്കും. എന്തൊക്കെയാണ് അതെന്നല്ലേ?

വിനാഗിരിയാണ് ചിലന്തിയെ വീട്ടിൽ നിന്ന് അപ്രത്യക്ഷമാക്കാനുള്ള ഏറ്റവും അനുയോജ്യമായ ഒരു വഴി. വിനാഗിരിയും വെള്ളവും സമാസമം യോജിപ്പിച്ച് ഒരു സ്‌പ്രേ ബോട്ടിലിൽ ആക്കുക. എന്നിട്ട് ചിലന്തി ശല്യമുള്ളയിടങ്ങളിൽ തളിച്ചുകൊടുക്കാം.

ഓറഞ്ച് തൊലിയാണ് അടുത്ത മാർഗം. ഓറഞ്ച് കഴിച്ച ശേഷം തൊലി വെറുതെ കളയേണ്ട. പകരം ചിലന്തി ശല്യമുള്ളയിടങ്ങിൽ ഓറഞ്ച് തൊലി കൊണ്ടുവച്ചാൽ മതി. ഇതിന്റെ മണം ചിലന്തിക്ക് ഇഷ്ടമില്ല. അതിനാൽ ചിലന്തി ശല്യം ഒഴിവാക്കാം.

പുകയില ചെറിയ കഷ്ണങ്ങളാക്കി ചിലന്തിയുടെ സാന്നിദ്ധ്യമുള്ളയിടങ്ങളിൽ കൊണ്ടുവച്ചാൽ അവയെ തുരത്താം. അല്ലെങ്കിൽ പുകയില പൊടിച്ച്, കുറച്ച് വെള്ളത്തിലിട്ട് നേർപ്പിച്ചെടുക്കുക, ഇനി ഈ മിശ്രിതം ഒരു സ്‌പ്രേ ബോട്ടിലിലാക്കി ചിലന്തിയുടെ ശല്യമുള്ളയിടങ്ങളിൽ തളിച്ചുകൊടുക്കാം. ഇങ്ങനെയും ചിലന്തിയെ ഓടിക്കാം.