നെല്ലിയാമ്പതി: സർക്കാർ ഓറഞ്ച് ആൻഡ് വെജിറ്റബിൾ ഫാമിൽ പരീക്ഷണാടിസ്ഥാനത്തിൽ ആദ്യമായി ആരംഭിച്ച ഡ്രാഗൺ ഫ്രൂട്ട് വിളവെടുപ്പ് ഉദ്ഘാടനം ജില്ലാ പഞ്ചായത്ത് പ്രസിഡന്റ് കെ.ബിനുമോൾ നിർവ്വഹിച്ചു. മലേഷ്യൻ റെഡ് എന്ന ഇനം ഡ്രാഗൺ ഫ്രൂട്ട് ആണ് കൃഷി ചെയ്തത്. 450 തൈകൾ ആണ് 2023 ഏപ്രിൽ മാസം നട്ടത്. 750 ഗ്രാം വരെ തൂക്കം ലഭിക്കുന്നുണ്ട്. ഇവിടെത്തെ പ്രത്യേക കാലാവസ്ഥയിലും ഈ വിദേശി ഇനം പഴവർഗം നല്ല പോലെ വളരുന്നുണ്ട്. രോഗ കീട ബാധകൾ തീരെ കുറവുമാണ്.

തരിശ് രഹിത ഫാം എന്ന ലക്ഷ്യത്തിലേക്ക് നീങ്ങുന്നതിന്റെ ഭാഗമായി സംസ്‌കരണത്തിനും മൂല്യ വർദ്ധനക്കും ഏറെ സാദ്ധ്യതയുള്ള ചോക്കലേറ്റ് ഉൾപ്പെടെ ഉണ്ടാക്കാൻ സാധിക്കുന്ന കൊക്കോ കൃഷി ഇതോടനുബന്ധിച്ച് തനിവിളയായും ഇടവിളയായും15 ഹെക്ടറിൽ വ്യാപിപ്പിക്കുന്നുണ്ട്. ജില്ലാ പഞ്ചായത്ത് മെമ്പർ ചന്ദ്രൻ, നെന്മാറ ബ്ലോക്ക് പഞ്ചായത്ത് പ്രസിഡന്റ് ലീലാമണി, ബ്ലോക്ക് പഞ്ചായത്ത് മെമ്പർ ഫാറൂക്ക്, പ്രിൻസിപ്പൽ കൃഷി ഓഫീസർ എം.എൻ.പ്രദീപൻ, കൃഷി ഡെപ്യൂട്ടി ഡയറക്ടർ അറുമുഖ പ്രസാദ് തുടങ്ങിയവർ സംബന്ധിച്ചു. ഫാം സൂപ്രണ്ട് പി.സാജിദലി ഫാമിന്റെ വിവിധ പ്രവർത്തനങ്ങൾ വിശദീകരിച്ചു. കൃഷി അസിസ്റ്റന്റുമാരായ സി.നാരായണൻ കുട്ടി, വി.എസ്.മഹേഷ്, വസീം ഫജ്ല്, കൃഷി ഓഫീസർ ദേവി കീർത്തന എന്നിവർ സംസാരിച്ചു. കൃഷ്ണകുമാർ, ജിനേഷ്, കൃഷ്ണദാസ്, ആതിര എന്നിവർ നേതൃത്വം നൽകി.