പത്തനംതിട്ട : നഗരസഭാ പരിധിയിൽ സ്ഥാപിച്ച ബയോ ബിന്നുകളിൽ ശേഖരിക്കുന്ന ജൈവമാലിന്യം ഹരിത കർമ്മ സേന വളമാക്കി വിൽക്കും. പാം ബയോഗ്രീൻ മാന്വർ എന്ന് പേരിട്ട വളത്തിന്റെ വിതരണോദ്ഘാടനം നഗരസഭ കൗൺസിൽ ഹാളിൽ ചെയർമാൻ അഡ്വ ടി സക്കീർ ഹുസൈൻ നിർവഹിച്ചു.

മുനിസിപ്പൽ ഓഫീസിലെ ബയോ ബിന്നിൽ നിന്ന് ഉത്പാദിപ്പിച്ച 40 കിലോ വളമാണ് ജനപ്രതിനിധികൾക്ക് നൽകിയത്. അടുത്ത ഘട്ടമായി കളക്ടറേറ്റ്, മിനി സിവിൽ സ്റ്റേഷൻ, ജില്ലാ പൊലീസ് മേധാവിയുടെ ഓഫീസ് എന്നിവിടങ്ങളിൽ ആരംഭിക്കും. തുടർന്ന് നഗരത്തിൽ സ്ഥാപിച്ചിട്ടുള്ള മുഴുവൻ ബയോബിന്നുകളിൽ നിന്നും വളം ഉത്പാദിപ്പിച്ച് വിതരണം നടത്തുമെന്ന് അദ്ദേഹം പറഞ്ഞു.

ഡെപ്യൂട്ടി ചെയർപേഴ്‌സൺ ആമിന ഹൈദരാലി, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ .ആർ അജിത് കുമാർ, പൊതുമരാമത്ത് സ്റ്റാൻഡിംഗ് കമ്മിറ്റി ചെയർപേഴ്‌സൺ ഇന്ദിരാമണിയമ്മ, ആരോഗ്യകാര്യ സ്റ്റാൻഡിംഗ് കമ്മിറ്റി ചെയർമാൻ ജെറി അലക്‌സ്, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എസ്. ഷമീർ, പ്രതിപക്ഷ നേതാവ് എ. ജാസിംകുട്ടി, കൗൺസിലർമാർ, മുനിസിപ്പൽ എൻജിനീയർ സുധീർ രാജ്, ക്ലീൻ സിറ്റി മാനേജർ വിനോദ് കുമാർ, ഗ്രീൻ വില്ലേജ് സീനിയർ പ്രോജ്ക്ട് കോർഡിനേറ്റർ കെ.എസ് പ്രസാദ് തുടങ്ങിയവർ പങ്കെടുത്തു. ഹരിത കർമ്മ സേനാംഗങ്ങൾ ജനപ്രതിനിധികൾക്ക് പാക്കറ്റുകളിലാക്കിയ വളം കൈമാറി. വാണിജ്യാടിസ്ഥാനത്തിൽ വില്പന നടത്തി വരുമാനം ഉണ്ടാക്കാമെന്ന പ്രതീക്ഷയിലാണ് ഹരിതകർമ്മസേന.