കോന്നി: വനംവകുപ്പിന്റെ അരുവാപ്പുലം തടിഡിപ്പോയിൽ തേക്ക് തടികളുടെ ചില്ലറ വില്പന 15 ന് ആരംഭിക്കും. വൻകിട കച്ചവടക്കാർ പങ്കെടുക്കുന്ന ഇ ലേലത്തിന് പുറമെയാണിത്. പൊതുജനങ്ങൾക്കായി രണ്ട് ബി, മൂന്ന് ബി ഇനം തേക്കുതടികളാണ് വില്പനയ്ക്കുള്ളത്. സംസ്ഥാനത്തുതന്നെ ഒന്നാമതുള്ള ഡിപ്പോയാണിത്. ലേലത്തിലൂടെ കോടികളാണ് വരുമാനം. കോന്നി- അച്ചൻകോവിൽ റോഡരികിലാണ് ഡിപ്പോ. വനംവകുപ്പിന്റെ പുനലൂർ ടിമ്പർ ഡിവിഷന്റെ കീഴിലുള്ള ആറ് തടി ഡിപ്പോകളിൽ ഏറ്റവും വലുതാണിത്. പിറവന്തൂർ , കടയ്ക്കമൺ, അരീക്കകാവ്, വീയപുരം, തൂയം എന്നിവയാണ് മറ്റ് ഡിപ്പോകൾ. മാസത്തിൽ രണ്ട് ലേലമുണ്ടാകും. വനം വകുപ്പിന്റെ തോട്ടങ്ങളിൽ 60 വർഷങ്ങൾക്ക് മുമ്പ് നട്ട തേക്കുകളാണ് തീർത്തുവെട്ട് നടത്തുന്നത്. സംസ്ഥാനത്തിെന്റെ വിവിധ ഭാഗങ്ങളിൽ നിന്നും തമിഴ്‌നാട്ടിൽ നിന്നും ലേലത്തിൽ പങ്കെടുക്കാൻ ആളുകൾ ഇവിടെയെത്തും. ഇപ്പോൾ ഇ ലേലമാണ്. കോന്നി , മണ്ണാറപ്പാറ, നടുവത്തുമുഴി റേഞ്ചുകളിലെ തടികളാണ് ലേലത്തിനായി എത്തുന്നത്. മുമ്പ് തടികൾ അട്ടിവച്ചിരുന്നത് ആനയെ ഉപേയോഗിച്ചായിരുന്നു. ഇപ്പോൾ ട്രാക്ടറിന്റെ സഹായത്തോടെയാണ് അട്ടിവയ്ക്കുന്നത്. 40 തൊഴിലാളികൾ ടേൺ അടിസ്ഥാനത്തിൽ പണിയെടുക്കുന്നുണ്ട്. ഫോൺ: 0468 - 2247972, 0475 - 2222617

വേണം രേഖകൾ

വീട് നിർമ്മിക്കുന്നതിന് തദ്ദേശസ്വയംഭരണ സ്ഥാപനങ്ങളിൽ നിന്നുള്ള അനുമതിപത്രം, കെട്ടിടത്തിന്റെ അംഗീകൃത പ്ലാൻ, സ്കെച്ച്, പാൻ കാർഡ്, തിരിച്ചറിയൽ കാർഡ്, എന്നിവയുടെ പകർപ്പും അഞ്ചു രൂപയുടെ കോർട്ട് ഫീ സ്റ്റാമ്പും സഹിതം എത്തിയാൽ എല്ലാ പ്രവൃത്തി ദിവസങ്ങളിലും ഡിപ്പോയിൽ നിന്ന് തേക്ക് തടികൾ വാങ്ങാൻ കഴിയും.