തിരുവല്ല : നഗരസഭയിലെ തിരുമൂലപുരം കമ്മ്യൂണിറ്റി സെന്റർ വികസനം സംബന്ധിച്ച് രാഷ്ട്രീയപ്പോര് മുറുകുന്നു. കമ്മ്യൂണിറ്റി ഹാൾ നിലനിറുത്തണമെന്ന് സി.പി.എം ആവശ്യപ്പെടുമ്പോൾ ഇവിടെ വെൽനസ് സെന്റർ ആരംഭിക്കണമെന്നാണ് ബി.ജെ.പിയുടെ ആവശ്യം. തിരുവല്ല നഗരസഭയ്ക്ക് നാഷണൽ ഹെൽത്ത് മിഷന്റെ കീഴിൽ 1. 33കോടി രൂപ അനുവദിച്ചിരുന്നു. മൂന്ന് വെൽനസ് സെന്ററുകളും അതോടൊപ്പം കാവുംഭാഗം അർബൻ ഹെൽത്ത് സെന്റർ പോളി ക്ലിനിക്കായി ഉയർത്തുന്നതിനുമാണ് ഈ തുക അനുവദിച്ചത്. ഇതിൽ 17-ാം വാർഡിലെ ഇരുവള്ളിപ്രയിൽ വെൽനസ് സെന്റർ ആരംഭിക്കുകയും തിരുമൂലപുരത്ത് നഗരസഭയുടെ ഉടമസ്ഥതയിലുള്ള കമ്മ്യൂണിറ്റി ഹാൾ വെൽനസ് സെന്ററായി പ്രവർത്തിക്കുന്നതിന് നിർമ്മാണോദ്ഘാടനവും നടത്തിയതാണ്. തിരുമൂലപുരത്തെയും സമീപ വാർഡുകളിലെയും ജനങ്ങൾക്ക് ഉപകാരപ്പെടുന്ന രീതിയിലാണ് ഈസ്ഥലം തിരഞ്ഞെടുത്തത്. കഴിഞ്ഞ കുറച്ച് വർഷങ്ങളായി ഈ കമ്മ്യൂണിറ്റി ഹാൾ നാശോന്മുഖമായി കിടക്കുകയും സാമൂഹ്യവിരുദ്ധരുടെ ഇടത്താവളവുമായി മാറിയെന്നും ആരോപണം ഉയർന്നിട്ടുണ്ട്. ഈ കെട്ടിടം നിലനിറുത്തിക്കൊണ്ടുതന്നെ വെൽനസ് സെന്റർ ആരംഭിക്കുന്നതിന് കൗൺസിൽ യോഗത്തിൽ അംഗീകാരം കൊടുക്കുകയും ജില്ലാതലത്തിൽ നിന്നും ഹെൽത്ത് മിഷന്റെ ഉദ്യോഗസ്ഥർ സ്ഥലപരിശോധന നടത്തി അനുയോജ്യമായ സ്ഥലമാണെന്ന് കണ്ടെത്തുകയും ചെയ്തു. മൂന്നാമത്തെ വെൽനസ് സെന്ററിനുള്ള സ്ഥലവും കെട്ടിടവും കണ്ടെത്താനുള്ള നടപടികൾ ആരംഭിക്കേണ്ടതാണ്. എന്നാൽ തുടർച്ചയായ വെള്ളപ്പൊക്കം മൂലം ദുരിതത്തിലാകുന്ന വലിയൊരു വിഭാഗം ജനങ്ങൾ തിരുമൂലപുരത്തും സമീപ പ്രദേശങ്ങളിലും താമസിക്കുന്നുണ്ട്. ഇവർക്ക് വെള്ളപ്പൊക്ക കാലത്ത് ദുരിതാശ്വാസ ക്യാമ്പായി പ്രവർത്തിക്കുന്ന കമ്മ്യൂണിറ്റി ഹാൾ ഏറെ ഉപകാരപ്രദമാണ്. മാത്രമല്ല വിശേഷ ദിവസങ്ങളിൽ ഒട്ടേറെ കുടുംബങ്ങൾ ഒത്തുചേർന്ന് ആഘോഷങ്ങൾ നടത്തുന്നതും ഇവിടെയാണ്. കമ്മ്യൂണിറ്റി ഹാൾ വെൽനെസ് സെന്ററാക്കി മാറ്റിയാൽ ഇതെല്ലാം ഒഴിവാക്കപ്പെടുന്ന സ്ഥിതിയുണ്ടാകുമെന്നും ആശങ്ക ഉയർന്നിട്ടുണ്ട്.

തിരുമൂലപുരം കമ്യൂണിറ്റി ഹാൾ നിലനിറുത്തണം: സി.പി.എം

സാധാരണക്കാർക്ക് ഏറെ പ്രയോജനകരമായ കമ്മ്യൂണിറ്റി ഹാൾ നിലനിറുത്തണമെന്നാവശ്യപ്പെട്ട് തിരുവല്ല ടൗൺ സൗത്ത് ലോക്കൽ കമ്മിറ്റി നേതൃത്വത്തിൽ തിരുവല്ല നഗരസഭാ ഓഫീസിലേക്ക് ബഹുജന മാർച്ച് നടത്തി. ഏരിയാ സെക്രട്ടറി അഡ്വ.ഫ്രാൻസിസ് വി ആന്റണി ഉദ്ഘാടനം ചെയ്തു. ടി.എ റെജികുമാർ അദ്ധ്യക്ഷനായി. സി.എൻ രാജേഷ്, എം.സി അനീഷ് കുമാർ, ടി.അജിത്കുമാർ എന്നിവർ സംസാരിച്ചു.

കേന്ദ്രപദ്ധതികൾ അട്ടിമറിക്കാൻ ഗൂഡനീക്കം : ബി.ജെ.പി

നഗരസഭയിലെ കേന്ദ്ര പദ്ധതികൾ അട്ടിമറിക്കാൻ ഗൂഡനീക്കം നടക്കുന്നതായി ബി.ജെ.പി ആരോപിച്ചു. രോഗികളായ സാധാരണക്കാർക്ക് പലകാര്യങ്ങൾക്കും തിരുവല്ല താലൂക്ക് ആശുപത്രിയെ ആശ്രയിക്കാതെ ഈ വെൽനസ് സെന്ററിൽ ചികിത്സ തേടാവുന്നതാണ്. അടിയന്തരമായി വെൽനസ് സെന്ററുകൾ ആരംഭിക്കണമെന്ന് ബി.ജെ.പി പാർലമെന്ററി പാർട്ടി യോഗം ആവശ്യപ്പെട്ടു. പാർട്ടി ലീഡർ ശ്രീനിവാസ് പുറയാറ്റ്, കൗൺസിലർമാരായ വിജയൻ തലവന, മിനി പ്രസാദ്, ഗംഗ രാധാകൃഷ്ണൻ, വിമൽ.ജി, പൂജാ ജയൻ എന്നിവർ സംസാരിച്ചു.