കൊല്ലം: കേരള സ്റ്റേറ്റ് കോ-ഓപ്പറേറ്റീവ് ഇൻസ്പെക്ടേഴ്സ് ആൻഡ് ഓഡിറ്റേഴ്സ് അസോസിയേഷൻ കൊല്ലം റീജണൽ ഓഫീസ് ഉദ്ഘാടനം നാളെ നടക്കും. ആനന്ദവല്ലീശ്വരം മഹാദേവർ ക്ഷേത്രത്തിന് പിന്നിൽ പണിതീർത്ത ബഹുനില മന്ദിരം ഉച്ചയ്ക്ക് 12ന് കെ.സി.വേണുഗോപാൽ എം.പി ഉദ്ഘാടനം ചെയ്യും. സംഘടനയുടെ അഞ്ചാമത്തെ റീജണൽ ഓഫീസാണ് കൊല്ലത്ത് ഉദ്ഘാടനം ചെയ്യുന്നത്.

സഹകരണ മേഖലയിലെ ഉദ്യോഗാർത്ഥികൾക്കായി സൗജന്യ പി.എസ്‌.സി പരിശീലനവും നടത്തും. സംസ്ഥാന പ്രസിഡന്റ് പി.കെ.ജയകൃഷ്ണൻ അദ്ധ്യക്ഷനാകും. കൊടിക്കുന്നിൽ സുരേഷ് എം.പി ലൈബ്രറി ഉദ്ഘാടനവും എൻ.കെ.പ്രേമചന്ദ്രൻ എം.പി കോൺഫറൻസ് ഹാൾ ഉദ്ഘാടനവും നിർവഹിക്കും. ആദരിക്കൽ ചടങ്ങ് പി.സി.വിഷ്ണുനാഥ് എം.എൽ.എയും, മെഡിക്കൽ ഉപകരണങ്ങളുടെ വിതരണം സി.ആർ.മഹേഷ് എം.എൽ.എയും നിർവഹിക്കും. ഡി.സി.സി പ്രസിഡന്റ് പി.രാജേന്ദ്രപ്രസാദ് തുടങ്ങിയവർ പങ്കെടുക്കും. ജനറൽ സെക്രട്ടറി കെ.വി.ജയേഷ് സ്വാഗതവും ജില്ലാ സെക്രട്ടറി മുഹമ്മദ് അൻസർ റിപ്പോർട്ടും, ട്രഷറർ സി.പി പ്രിയേഷ് നന്ദിയും പറയും.