കടയ്ക്കൽ: ഓണക്കാലത്ത് വിഷരഹിതമായ ജൈവ പച്ചക്കറി കൃഷി ലക്ഷ്യമിട്ടുകൊണ്ട് ചടയമംഗലം ബ്ലോക്ക് പ്രദേശത്തെ കർഷകരുടെ കമ്പനിയായ കടയ്ക്കൽ ഫാർമർ പ്രൊഡ്യൂസർ കമ്പനി അത്തം ജൈവ പച്ചക്കറി കൃഷി നടപ്പിലാക്കുന്നു. ബ്ലോക്ക് പഞ്ചായത്ത് പ്രസിഡന്റ് ലതികാ വിദ്യാധരൻ പദ്ധതി ഉദ്ഘാടനം നിർവഹിച്ചു. കർഷക കമ്പനിയിലെ അംഗങ്ങളുടെ വീടുകളിൽ ജൂലായ് 7ന് പച്ചക്കറി കൃഷിക്ക് വേണ്ടിയുള്ള വിത്തിടീൽ സംഘടിപ്പിക്കും. സെപ്തംബർ 10ന് വിളവെടുപ്പ് നടത്തും. പച്ചക്കറി കൃഷിയിലൂടെ ഉത്പാദിപ്പിക്കുന്ന ജൈവ പച്ചക്കറികൾ കർഷക കമ്പനി ഏറ്റെടുത്ത് മാർക്കറ്റ് ചെയ്യും. വാണിജ്യാടിസ്ഥാനത്തിൽ കൃഷി ചെയ്യാൻ താത്പര്യമുള്ള കർഷകർ കമ്പനിയിൽ രജിസ്റ്റർ ചെയ്യണമെന്ന് കമ്പനി അറിയിച്ചു. കമ്പനി ചെയർമാൻ ജെ.സി.അനിൽ അദ്ധ്യക്ഷനായി. കുമ്മിൾ പഞ്ചായത്ത് വികസന സ്റ്റാൻഡിംഗ് കമ്മിറ്റി ചെയർമാൻ കെ.കൃഷ്ണപിള്ള തൈകളുടെയും വിത്തുകളുടെയും വിതരണോദ്ഘാടനം നിർവഹിച്ചു. കമ്പനി ഡയറക്ടർമാരായ സി.പി.ജസിൻ, എസ്.വിജയ കുമാരൻപിള്ള, കെ.ഓമനക്കുട്ടൻ,വി. ബാബു, എസ്.സുരേന്ദ്രൻ, കെ.രാജേന്ദ്രൻ നായർ,എസ്.ജയപ്രകാശ്, മനോജ് കുഞ്ഞപ്പൻ, റജീന, ഗോപാല കൃഷ്ണ പിള്ള തുടങ്ങിയവർ പങ്കെടുത്തു. കമ്പനി സി.ഇ.ഒ മുന്ന മുഹമ്മദ് സുഹൈൽ നന്ദി പറഞ്ഞു.