1.2 ഏക്കർ ഭൂമി

113 കോടിയുടെ പദ്ധതി

30 കോടി അനുവദിച്ചു

കൊട്ടാരക്കര: കൊട്ടാരക്കര-നെടുവത്തൂർ കുടിവെള്ള പദ്ധതി ഫയലിൽ ഉറങ്ങുന്നു. പദ്ധതി പ്രഖ്യാപിച്ച് രണ്ടു വർഷം കഴിഞ്ഞിട്ടും നിർമ്മാണം തുടങ്ങിയിട്ടില്ല. ജലസംഭരണി നിർമ്മാണത്തിനായി നെടുവത്തൂർ പഞ്ചായത്ത് ഭൂമി വാങ്ങി വാട്ടർ അതോറിട്ടിക്ക് ഒന്നര വർഷം മുമ്പേ കൈമാറിയതാണ്. കൊട്ടാരക്കര നഗരസഭയിൽ ഭൂമി വാങ്ങൽ വിവാദത്തിലായി. തർക്കങ്ങൾക്കൊടുവിൽ 1.2 ഏക്കർ ഭൂമിയാണ് വാങ്ങിയത്. 113 കോടി രൂപ ചെലവു പ്രതീക്ഷിക്കുന്ന പദ്ധതിയുടെ ആദ്യഘട്ടത്തിനായി റീ ബിൽഡ് കേരള പദ്ധതിയിലുൾപ്പെടുത്തി 30 കോടി രൂപ അനുവദിച്ചിരുന്നു. കേന്ദ്ര പദ്ധതിയായ അമൃതിൽ പദ്ധതി ഉൾപ്പെടുത്തുമെന്നു കരുതിയിരുന്നെങ്കിലും നടപ്പായില്ല.

• കല്ലടയാറ്റിൽ കുളക്കട, തെങ്ങോലിക്കടവിൽ കിണർ നിർമ്മിച്ച് ഉഗ്രൻകുന്നിൽ പുതിയതായി വാങ്ങിയ ഭൂമിയിൽ നിർമ്മിക്കുന്ന ശുദ്ധീകരണ ശാലയിൽ ജലം എത്തിച്ച് വിതരണം ചെയ്യുന്നതാണ് പദ്ധതി.
• 16 ദശലക്ഷം ലിറ്റർ ശേഷിയുള്ള ശുദ്ധീകരണ ശാലയും 18 ലക്ഷം ലിറ്റർ ശേഷിയുള്ള സംഭരണിയും ഉഗ്രൻ കുന്നിൽ
• 11 കിലോമീറ്റർ നീളത്തിൽ മെയിൻ പമ്പിംഗ് ലൈൻ, 510 എച്ച്.പി., 560 എച്ച്.പി. മോട്ടറുകൾ സ്ഥാപിക്കൽ, ശുദ്ധീകരണശാല, ജലംഭരണികൾ എന്നിവയുടെ നിർമ്മാണം, പ്രധാന വിതരണ കുഴലുകൾ സ്ഥാപിക്കൽ എന്നിവയാണ് ആദ്യഘട്ടത്തിൽ നടക്കേണ്ടിയിരുന്നത്.
• ഭൂമി വാങ്ങിയതല്ലാതെ മറ്റൊന്നും ഇതുവരെ നടന്നിട്ടില്ല.
• നെടുവത്തൂർ പഞ്ചായത്തിൽ ജലജീവൻ പദ്ധതിയിൽ ഉൾപ്പെടുത്തി ജലവിതരണ കുഴൽ സ്ഥാപിക്കൽ ജോലികൾ നടന്നിരുന്നെങ്കിലും കരാറുകാർക്ക് കുടിശികയുള്ളതിനാൽ അതും നിലച്ചു.
• നഗരസഭയിലും നെടുവത്തൂരിലുമായി ആറിടങ്ങളിൽ ചെറു സംഭരണികളുടെ നിർമ്മാണം 300 കി.മീ.വിതരണ കുഴലുകൾ സ്ഥാപിക്കൽ എന്നിവയാണ് രണ്ടാം ഘട്ടം.

മന്ത്രി ഇടപെട്ടാൽ പദ്ധതി നടപ്പാകും

കുടിവെള്ള ക്ഷാമം രൂക്ഷമായ നെടുവത്തൂർ പഞ്ചായത്തിനും കൊട്ടാരക്കര നഗരസഭക്കും വലിയ പ്രതീക്ഷ നൽകുന്ന പദ്ധതിയാണ് എങ്ങുമെത്താതെ ഫയലിൽ ഉറങ്ങുന്നത്. എല്ലാ വീടുകൾക്കും കുടിവെള്ള ലഭ്യതയാണ് ലക്ഷ്യം വച്ചത്. മന്ത്രി കെ എൻ ബാലഗോപാൽ ഇടപെട്ടാൽ മാത്രമേ ഇനി പദ്ധതി നടപ്പാകുള്ളൂ.