കൊല്ലം: അന്തി​ മയങ്ങി​യാൽ കളക്ടറേറ്റ് ജംഗ്ഷൻ മുതൽ ഹൈസ്കൂൾ ജംഗ്ഷൻ വരെയുള്ള യാത്ര കൂരി​രി​ട്ടി​ലൂടെയാവും. കയ്യി​ൽ വെളി​ച്ചമി​ല്ലെങ്കി​ൽ വാഹനങ്ങളുടെ വെള്ളി​ച്ചം മാത്രമാവും ആശ്രയം.

ഇവിടെയുള്ള തെരുവ് വിളക്കുകൾ ഒന്നും തെളിയാത്തതാണ് കാൽനടയാത്രക്കാരെയും ഇരുചക്രവാഹന യാത്രികരെയും ഒരുപോലെ ബുദ്ധിമുട്ടിലാക്കിയിരിക്കുന്നത്. ആഴ്ചകളായി ഇതാണ് അവസ്ഥ. ആറ് തെരുവുവിളക്കുകൾ ഒന്നി​ച്ച് കണ്ണടച്ചു. സമീപത്തെ കടകളിൽ നിന്നും മറ്റും സ്ത്രീകളുൾപ്പെടെ നിരവധിപ്പേരാണ് ഇതുവഴി കടന്നുപോകുന്നത്. കടകളിൽ നിന്നുള്ള വെട്ടം കൂടി അണഞ്ഞാൽ ഇവിടം പൂർണമായും ഇരുട്ടിലാകും. ഇതോടെ, ഭയന്നാണ് ഇതുവഴി​യുള്ള യാത്ര.

തെരുവുനായ ശല്യവും ഈ ഭാഗത്ത് രൂക്ഷമാണ്. ഇരുട്ടായതിനാൽ തെരുവുനായ്ക്കൾ നിൽക്കുന്നത് പെട്ടെന്ന് ശ്രദ്ധയിൽപെടില്ല. കുരച്ച് ചാടുമ്പോൾ പലരും ഒഴിഞ്ഞുമാറുന്നത് റോഡിലേക്കാണ്. തുരുതുരെ വാഹനങ്ങൾ കടന്നുപോകുമ്പോൾ ഇത്തരത്തിൽ ഒഴിഞ്ഞുമാറുന്നത് വലിയ അപകടങ്ങൾക്കാണ് വഴിവെയ്ക്കുന്നത്. റോഡിലെ കുഴിയും അപകട സാദ്ധ്യത കൂട്ടുന്നു. തെരുവ് നായ്ക്കളും റോഡി​ലെ കുഴി​യും ഇരുചക്രവാഹന യാത്രി​കർക്കും ഒരുപോലെ ഭീഷണിയാണ്. ഇരുട്ടി​ൽ കുഴി​കളും പെട്ടെന്ന് ശ്രദ്ധയിൽപ്പെടില്ലെന്നാണ് യാത്രക്കാർ പറയുന്നത്.

അറ്റകുറ്റപ്പണി​ കോർപ്പറേഷന്

വിളക്കുകളുടെ അറ്റകുറ്റപ്പണികൾ കോർപ്പറേഷന്റെ ചുമതലയാണ്. കോർപ്പറേഷൻ കരാർ നൽകുന്നവരാണ് വിളക്കുകൾ തെളിക്കേണ്ടത്. കേബിളുകളുടെ തകരാർ കാരണമാണ് വിളക്ക് തെളിയാത്തതെന്നും പ്രശ്നത്തിന് പരിഹാരം കാണാനുള്ള നടപടികൾ സ്വീകരിക്കുമെന്നും അധികൃതർ വ്യക്തമാക്കി.