കൊല്ലം: ശ്രീനാരായണ ഗുരുദേവന്റെ 170-ാമത് ജയന്തി ആഘോഷങ്ങളോടനുബന്ധിച്ച് എസ്.എൻ.ഡി.പി യോഗം കൊല്ലം യൂണിയന്റെയും ശ്രീനാരായണ ട്രസ്റ്റിന്റെയും കേരളകൗമുദിയുടെയും ആഭിമുഖ്യത്തിൽ സ്‌കൂൾ, കോളേജ് വിദ്യാർത്ഥികൾക്കും വിവിധ സ്ഥാപനങ്ങളിലെ ജീവനക്കാർക്കും പൊതുജനങ്ങൾക്കും വേണ്ടി വിവിധ സാഹിത്യ മത്സരങ്ങൾ നടത്തും. ശ്രീനാരായണ ഗുരുവും വിദ്യാഭ്യാസ ദർശനവും എന്നതാണ് സ്കൂൾതല ഉപന്യാസരചനയുടെ വിഷയം. സ്ത്രീ സ്വാതന്ത്ര്യവും സാമൂഹ്യ പുരോഗതിയും ഗുരുവിന്റെ വീക്ഷണത്തിൽ എന്നത് കോളേജ് വിഭാഗത്തിലുള്ള ഉപന്യാസ വിഷയം. വി​വി​ധ സ്ഥാപനങ്ങളി​ലെ ജീവനക്കാർക്കുള്ള വി​ഷയം കുമാരനാശാൻ കൃതികളിലെ പ്രപഞ്ച സ്നേഹവും ധാർമ്മികതയുമാണ്. സവർണ്ണ മേൽക്കോയ്‌മയും ജാതി വിവേചനവും അന്നും ഇന്നും എന്നതാണ് പൊതു വിഭാഗത്തിലുളള വിഷയം. ഫുൾസ്കാപ്പ് പേപ്പറിന്റെ 10 പേജിൽ കവിയാത്ത സൃഷ്ട‌ികൾ ആഗസ്റ്റ് 5ന് മുമ്പ് പട്ടത്താനം സുനിൽ, വത്സലാ നിവാസ്, ശ്രീനഗർ-25, പട്ടത്താനം പി.ഒ, കൊല്ലം-21 (ഫോൺ: 9847747771) എന്ന വിലാസത്തിലോ എസ്.എൻ.ഡി​.പി​ യോഗം കൊല്ലം യൂണിയൻ ആഫീസിലോ (ഫോൺ: 0474-2746196) ലഭി​ക്കണം.

സബ്ജൂനിയർ, ജൂനിയർ, സീനിയർ, ജീവനക്കാർ, പൊതുവിഭാഗം എന്നി​വർക്കുള്ള മറ്റ് മത്സരങ്ങൾ: ക്വി​സ്, പ്രസംഗം, കഥാരചന, കവിതാരചനാ, ചിത്രരചന, സ്‌കൂൾതലത്തിൽ ദൈവദശകം ആലാപനം (സിംഗിൾ), കോളേജ് തലത്തിൽ കുമാരാനാശാന്റെ ദുരവസ്ഥ എന്ന കവിതയിലെ 'അങ്ങടുത്തായ് മേഞ്ഞു നിറം മങ്ങി പതിഞ്ഞ പാഴ് പുല്ലുമാടം എന്നു തുടങ്ങി ഹാ! ഹിന്ദുധർമ്മമേ ജാതി മൂലം' വരെ ആലാപനം (സിംഗിൾ) എന്നിവ ആഗസ്റ്റ് 10ന് രാവിലെ 9 മുതൽ കൊല്ലം ശ്രീനാരായണ വനിതാ കോളേജ് ഓഡിറ്റോറിയത്തിൽ നടക്കും. പങ്കെടുക്കുന്നവർ മുൻകൂട്ടി പേര് രജിസ്റ്റർ ചെയ്ത് അന്ന് രാവിലെ 9ന് മുമ്പ് കോളേജിൽ എത്തണം.