കൊല്ലം: സൗത്ത് സോൺ ഹോക്കി ചാമ്പ്യൻഷിപ്പിൽ ഫൈനൽ ലക്ഷ്യമിട്ട് കേരള ടീം ഇന്ന് ഇറങ്ങും. രാവിലെ 10ന് നടക്കുന്ന വനിതകളുടെ മത്സരത്തിൽ കേരളം ആന്ധ്രാപ്രദേശിനെ നേരിടും. സമനില ലക്ഷ്യമിട്ടായിരിക്കും ആന്ധ്രയുടെ പോരാട്ടം. കേരളത്തിന് വിജയത്തിനൊപ്പം രാവിലെ 6.30ന് നടക്കുന്ന തമിഴ്നാട് -കർണാടക മത്സരവും അനിവാര്യമാണ്. നിലവിൽ ഗ്രൂപ്പിൽ മൂന്ന് ജയവും ഒരു തോൽവിയുമായി ഒൻപത് പോയിന്റാണ് കേരളത്തിനും തമിഴ്നാടിനും ഉള്ളത്. ഗോൾ ഡിഫറൻസിന്റെ അടിസ്ഥാനത്തിലാണ് കേരളം ഗ്രൂപ്പിൽ രണ്ടാമത്. രാവിലെ നടക്കുന്ന തമിഴ്നാട് -കർണാടക മത്സരത്തിൽ തമിഴ്നാട് ആറ് ഗോളിൽ കൂടുതൽ കർണാടകയ്ക്ക് എതിരെ നേടാതിരിക്കുകയും കേരളം ആന്ധ്രാപ്രദേശിനെ തോൽപ്പിക്കുകയും ചെയ്താൽ കേരളത്തിന് ഫൈനലിലേക്ക് യോഗ്യത നേടാം. ഇല്ലെങ്കിൽ ഗ്രൂപ്പിലെ മൂന്നാം സ്ഥാനക്കാരായി മൂന്നാം സ്ഥാനത്തിനുള്ള മത്സരത്തിലേക്ക് യോഗ്യത നേടും.

വൈകിട്ട് 3.15ന് നടക്കുന്ന പുരുഷന്മാരുടെ മത്സരത്തിൽ കേരളം തെലുങ്കാനയെ നേരിടും. നിലവിൽ പോയിന്റ് പട്ടികയിൽ ഒന്നാംസ്ഥാനക്കാരായ കേരള ടീം ഫൈനലിലേക്ക് യോഗ്യത നേടിയിട്ടുണ്ട്. പുരുഷന്മാരുടെ ഗ്രൂപ്പിൽ രണ്ടാം സ്ഥാനത്തിനുള്ള പോരാട്ടമാണ് നടക്കുന്നത്. തമിഴ്നാടും പുതുച്ചേരിയും ഗ്രൂപ്പിൽ രണ്ടാം സ്ഥാനം സ്വന്തമാക്കി ഫൈനലിലേക്ക് യോഗ്യത നേടാനുള്ള ശ്രമത്തിലാണ്. പുതുച്ചേരി കർണാടകയെയും തമിഴ്നാട് ആന്ധ്രാപ്രദേശിനെയും നേരിടും. മൂന്നാം നാലും സ്ഥാനത്തേക്കു കൂടി മത്സരം നടക്കുന്നത് കൊണ്ട് രണ്ട് മത്സരങ്ങളും എല്ലാ ടീമുകൾക്കും നിർണായകമാണ്. ഗ്രൂപ്പിലെ ആദ്യ രണ്ട് സ്ഥാനക്കാരായിരിക്കും ഫൈനലിലേക്ക് യോഗ്യത നേടുക. ഗ്രൂപ്പിലെ മൂന്നും നാലും സ്ഥാനം ലഭിക്കുന്നവർ മൂന്നാം സ്ഥാനത്തിനുള്ള പോരാട്ടത്തിലേക്ക് യോഗ്യത നേടും.