തൃശൂർ: ജില്ലയിലെ സ്വാതന്ത്ര്യ ദിനാഘോഷ പരിപാടി തേക്കിൻകാട് മൈതാനത്ത് വിദ്യാർത്ഥി കോർണറിൽ നടക്കും. എ.ഡി.എം: ടി. മുരളിയുടെ അദ്ധ്യക്ഷതയിൽ സ്വാതന്ത്ര്യദിനാഘോഷം മുന്നൊരുക്കങ്ങളുടെ ഭാഗമായി ആലോചനാ യോഗം ചേർന്നു. പരേഡ് പരിശീലനം ആഗസ്റ്റ് എട്ട്, ഒമ്പത്, 11, 12 തീയതികളിൽ നടത്താൻ തീരുമാനിച്ചു. പൊലീസ്, ഫയർ ആൻഡ് റെസ്‌ക്യൂ, എക്‌സൈസ്, ഫോറസ്റ്റ്, സ്റ്റുഡന്റ് പൊലീസ്, എൻ.സി.സി, തുടങ്ങിയ വിവിധ വിഭാഗങ്ങൾ പരേഡിൽ അണിനിരക്കും. പരിശീലന സമയത്തും സ്വാതന്ത്ര്യദിനത്തിലും ആരോഗ്യ വകുപ്പിന്റെ നേതൃത്വത്തിൽ ആംബുലൻസ് ഉൾപ്പെടെയുള്ള മെഡിക്കൽ സഹായം ഉറപ്പാക്കും. പരേഡിൽ പങ്കെടുക്കുന്ന വിദ്യാർത്ഥികൾക്ക് യാത്രാ സൗകര്യം ഏർപ്പെടുത്തും. ഭരണസിരാകേന്ദ്രമായ സിവിൽ സ്റ്റേഷനിലും മറ്റ് ഓഫീസുകളിലും സ്വാതന്ത്ര്യ ദിനം ആഘോഷിക്കും. പൂർണമായും ഹരിതചട്ടം പാലിക്കും. പരിപാടിയുടെ നടത്തിപ്പിന് എ.ഡി.എം നോഡൽ ഓഫീസറായി സബ് കമ്മിറ്റി രൂപീകരിച്ചു. കളക്ടറേറ്റിലെ എക്‌സിക്യൂട്ടീവ് കോൺഫറൻസ് ഹാളിൽ ചേർന്ന യോഗത്തിൽ വകുപ്പ്തല ഉദ്യോഗസ്ഥർ പങ്കെടുത്തു.