തൃശൂർ: മഴ തുടരുന്ന സാഹചര്യത്തിൽ ജില്ലയിൽ അഞ്ച് താലൂക്കുകളിലായി നിലവിൽ 11 ക്യാമ്പുകൾ പ്രവർത്തിക്കുന്നതായി ജില്ലാ ദുരന്തനിവാരണ അതോറിറ്റി അറിയിച്ചു. 54 കുടുംബങ്ങളാണ് ഇവിടെയുള്ളത്. ഇതിൽ 72 പുരുഷന്മാരും 79 സ്ത്രീകളും 37 കുട്ടികളും ഉൾപ്പെടുന്നു. ചാലക്കുടി ഒന്ന്, കൊടുങ്ങലൂർ രണ്ട്, കുന്നംകുളം ഒന്ന്, മുകുന്ദപുരം ആറ്, തൃശൂർ ഒന്ന് എന്നിങ്ങനെയാണ് വിവിധ താലൂക്കുകളിലായി പ്രവർത്തിക്കുന്ന ക്യാമ്പുകളുടെ എണ്ണം.
കഴിഞ്ഞ 24 മണിക്കൂറിൽ ജില്ലയിൽ 58.33 മില്ലിമീറ്റർ മഴയാണ് ലഭിച്ചത്. 17 വീടുകൾ ഭാഗികമായും ഒരു വീട് പൂർണമായും തകർന്നു. പി.ഡബ്ല്യൂ.ഡി റോഡുകൾ തകർന്ന് 85.7 ലക്ഷം രൂപയുടെയും കെ.എസ്.ഇ.ബിക്ക് 31.922 ലക്ഷം രൂപയുടെയും നഷ്ടമുണ്ടായതായി അധികൃതർ അറിയിച്ചു. ജില്ലയിൽ നിലവിൽ പെരിങ്ങൽക്കുത്ത്, പൂമല, അസുരൻകുണ്ട് ഡാമുകൾ തുറന്നിട്ടുണ്ട്.