തൃശൂർ: കേരള സംഗീത നാടക അക്കാഡമിയുടെ ഫെലോഷിപ്പ്, അവാർഡ്, ഗുരുപൂജാ പുരസ്‌കാരങ്ങൾ മന്ത്രി സജി ചെറിയാൻ ഇന്ന് സമർപ്പിക്കും. രാവിലെ 11ന് കെ.ടി. മുഹമ്മദ് തിയറ്ററിൽ നടക്കുന്ന ചടങ്ങിൽ മൃദംഗവിദ്വാൻ പ്രൊഫ. പാറശ്ശാല രവി, നാടകപ്രതിഭ ടി.എം. അബ്രഹാം, നർത്തകിയും നൃത്താദ്ധ്യാപികയുമായ കലാ വിജയൻ എന്നിവർ മന്ത്രിയിൽ നിന്നും ഫെലോഷിപ്പ് ഏറ്റുവാങ്ങും. ഫെലോഷിപ്പ് ജേതാക്കൾക്ക് 50,000 രൂപ വീതവും ഫലകവും പ്രശസ്തിപത്രവുമാണ് ലഭിക്കുക. 17 കലാപ്രതിഭകൾ അവാർഡും മുതിർന്ന 22 കലാപ്രതിഭകൾ ഗുരുപൂജാ പുരസ്‌കാരവും ഏറ്റുവാങ്ങും. അവാർഡ്, ഗുരുപൂജാ പുരസ്‌കാര ജേതാക്കൾക്ക് 30,000 രൂപ വീതവും ഫലകവും പ്രശസ്തിപത്രവുമാണ് ലഭിക്കുക. അക്കാഡമി ചെയർമാൻ മട്ടന്നൂർ ശങ്കരൻകുട്ടി അദ്ധ്യക്ഷനാകും.