തൃശൂർ: മിത്തുകളെ വ്യാഖ്യാനിച്ചും പ്രചരിപ്പിച്ചും യാഥാർത്ഥ്യമാണെന്ന് വരുത്തിത്തീർക്കാനുള്ള ശ്രമമാണ് നടക്കുന്നതെന്ന് മന്ത്രി ഡോ.ആർ.ബിന്ദു. സഹൃദയ സദസിന്റെ ആഭിമുഖ്യത്തിൽ 'മിത്തുകളിലെ ദൈവങ്ങൾ' സംവാദം ഉദ്ഘാടനം ചെയ്യുകയായിരുന്നു മന്ത്രി. മുതിർന്ന മാദ്ധ്യമപ്രവർത്തകനായ ഫ്രാങ്കോ ലൂയിസ് രചിച്ച '100 മിത്തുകൾ' എന്ന പുരാണ കഥാസമാഹാര ഗ്രന്ഥം മന്ത്രി പ്രകാശനം ചെയ്തു. സീനിയർ ജേണലിസ്റ്റ്‌സ് ഫോറം തൃശൂർ ജില്ലാ പ്രസിഡന്റ് അലക്‌സാണ്ടർ സാം അദ്ധ്യക്ഷനായി. ദീപിക ചീഫ് എഡിറ്റർ ഫാ.ജോർജ് കുടിലിൽ മുഖ്യാതിഥിയായി.
കവി പ്രൊഫ.വി.ജി.തമ്പി പുസ്തകപരിചയം നിർവഹിച്ചു. പത്രപ്രവർത്തക യൂണിയൻ സംസ്ഥാന പ്രസിഡന്റ് എം.വി.വിനീത ആദ്യ കോപ്പി ഏറ്റുവാങ്ങി. 24 ന്യൂസ് ചാനൽ എഡിറ്റർ പി.പി.ജയിംസ്, മീഡിയ അക്കാഡമി വൈസ് ചെയർമാൻ ഇ.എസ്.സുഭാഷ്, എക്‌സ്പ്രസ് എഡിറ്റർ ഡേവിസ് കണ്ണനായ്ക്കൽ, ജീവൻ ടിവി ചീഫ് ന്യൂസ് എഡിറ്റർ ബാബു വെളപ്പായ, ജോയ് മണ്ണൂർ, സഹൃദയ സദസ് ചെയർമാൻ സി.ആർ.രാജൻ, ഡെയ്‌ലി ന്യൂസ് ലൈവ് ഡോട്ട് ഇൻ എഡിറ്റർ ഷാജി പദ്മനാഭൻ, ജസീന്ത മോറിസ്, മനു ഫ്രാങ്കോ, വിനു മാത്യു എന്നിവർ പ്രസംഗിച്ചു. ആർട്ടിസ്റ്റ് പി.ജെ.ജോസഫിനെ മന്ത്രി ആദരിച്ചു.