വർക്കല: കുവൈറ്റിലെ തീപിടിത്തത്തിൽ മരിച്ച വർക്കല ഇടവ സ്വദേശി ശ്രീജേഷിന്റെ സഹോദരി ആരതിക്ക് സർക്കാർ ധനസഹായം മന്ത്രി വി. ശിവൻകുട്ടി കൈമാറി. മുഖ്യമന്ത്രിയുടെ ദുരിതാശ്വാസ നിധിയിൽ നിന്നും അഞ്ച് ലക്ഷം രൂപയും നോർക്ക റൂട്സിൽ നിന്ന് ഒൻപത് ലക്ഷം രൂപയും ഉൾപ്പെടെ പതിനാല് ലക്ഷം രൂപയുടെ ചെക്ക് ഇലകമൺ കെടാകുളത്തുള്ള ആരതിയുടെ വീട്ടിൽ നേരിട്ട് എത്തിയാണ് മന്ത്രി നൽകിയത്. നോർക്ക വൈസ് ചെയർമാൻ എം.എ യൂസഫലി അഞ്ച് ലക്ഷം രൂപയും നോർക്ക ഡയറക്ടർ ഡോ.രവി പിള്ള രണ്ട് ലക്ഷം രൂപയും ലോകകേരള സഭാംഗവും ഫൊക്കാന പ്രസിഡന്റുമായ ബാബു സ്റ്റീഫൻ രണ്ട് ലക്ഷം രൂപയുമാണ് ധനസഹായമായി നൽകിയത്. അഡ്വ.വി. ജോയി എം. എൽ. എ, വർക്കല ബ്ലോക്ക്‌ പഞ്ചായത്ത്‌ പ്രസിഡന്റ്‌ അഡ്വ.സ്മിത സുന്ദരേശൻ, ജില്ലാ പഞ്ചായത്തംഗം ഗീതാ നസീർ, ജില്ലാ കളക്ടർ ജെറോമിക് ജോർജ്ജ്, നോർക്ക റൂട്ട്സ് മാനേജർ ഫിറോസ് ഷാ, വർക്കല തഹസീൽദാർ ആസിഫ് റിജു എന്നിവരും മന്ത്രിക്കൊപ്പം ഉണ്ടായിരുന്നു.