തിരുവനന്തപുരം: ഒരു നഗരത്തിൽ ഒരു രാത്രി നടക്കുന്ന മോഷണത്തിന്റെ പശ്ചാത്തലത്തിൽ സമൂഹത്തിലെ വ്യത്യസ്ത തുറകളിലെ മനുഷ്യരുടെ കഥയിലൂടെ പുരോഗമിക്കുന്ന സിനിമ 'പട്ടാപ്പകലി'നെ പ്രേക്ഷകർ ഏറ്റെടുത്തു. മികച്ചൊരു കഥ തമാശയിൽ പൊതിഞ്ഞ് അവതരിപ്പിക്കുന്ന ചിത്രത്തിൽ അതിന്റെ താളം അവസാനംവരെ നിലനിറുത്താൻ സംവിധായകൻ സാജിർ സദഫിന് കഴിഞ്ഞു.

കേന്ദ്രകഥാപാത്രങ്ങളായി എത്തുന്ന എസ്.വി.കൃഷ്ണശങ്കർ, കിച്ചു ടെല്ലസ്, സുധി കോപ്പ എന്നിവർ അവരുടെ റോളുകൾ മികവുറ്റതാക്കി. ശ്രീ നന്ദനം ഫിലിംസിന്റെ ബാനറിൽ എൻ.നന്ദകുമാർ നിർമ്മിച്ച ചിത്രത്തിന് തിരക്കഥ ഒരുക്കിയത് പി.എസ്. അർജുനാണ്. ഈടുറപ്പുള്ള തിരക്കഥ അവതരണത്തിന് കരുത്തേകി.

രമേഷ് പിഷാരടി, ജോണി ആന്റണി, ഗോകുലൻ, ഫ്രാങ്കോ ഫ്രാൻസിസ്, പ്രശാന്ത് മുരളി, വിനീത് തട്ടിൽ, രഞ്ജിത്ത് കൊങ്കൽ, രഘുനാഥ്, വൈശാഖ് വിജയൻ, ഗീതി സംഗീത, ആമിന, സന്ധ്യ എന്നിവരും തങ്ങളുടെ കഥാപാത്രങ്ങളെ ഗംഭീരമാക്കി. ജസൽ സഹീർ ചിത്രസംയോജനം ചെയ്ത ചിത്രത്തിൽ ഷാൻ റഹ്‌‌മാനാണ് സംഗീതം ഒരുക്കിയത്. മനു മഞ്ജിത്തിന്റെ വരികളും മനോഹരം.