മലയിൻകീഴ്: പൊതുവഴികളിലും പ്രധാന റോഡുകളിലും വ്യാപക മാലിന്യ നിക്ഷേപം. കാട്ടുവിള- ചെറുകോട് മുക്കാം പാലമൂട് റോഡിൽ മുക്കം പാലമൂടിനു സമീപം സ്വകാര്യ വ്യക്തിയുടെ പുരയിടത്തിൽ മാലിന്യമല തന്നെ രൂപപ്പെട്ടിട്ടുണ്ട്. മലയിൻകീഴ് ഗ്രാമപഞ്ചായത്തിലെ മഞ്ചാടി വാർഡിൽ ഉൾപ്പെട്ട
ഭാഗത്തും ലോഡ് കണക്കിനാണ് മാലിന്യം നിക്ഷേപിച്ചിരിക്കുന്നത്.

ചെറുകോട്-കാട്ടുവിള നവീകരിച്ച റോഡിന് ഇരുവശത്തും മാലിന്യ നിക്ഷേപ കേന്ദ്രമായി മാറിയിട്ടുണ്ട്. മാലിന്യത്തിന്റെ ദുർഗന്ധം കാരണം വഴിയാത്രക്കാരും ദുരിതത്തിലാണ്. യാതൊരു നിയന്ത്രണവുമില്ലാതെയാണ് മാലിന്യം നിക്ഷേപിക്കുന്നത്. വഴിപോക്കരും വാഹന യാത്രക്കാരും ദുർഗന്ധം സഹിച്ച് മൂക്ക് പൊത്തി പോകേണ്ട ഗതികേടിലാണ്.

തെരുവുനായ ശല്യവും

ചാക്കുകളിലും കൂറ്റൻ കവറുകളിലുമായി കൊണ്ടിടുന്ന മാലിന്യപ്പൊതികൾ തെരുവുനായ്ക്കൾ കടിച്ചുകീറി റോഡിൽ ഇടുന്നത് പതിവായിട്ടുണ്ട്. ഇത് പലപ്പോഴും അപകടങ്ങൾക്കും കാരണമാകാറുണ്ട്.

തോട് മലിനമാകുന്നു

മഴക്കാലത്ത് മാലിന്യം അഴുകി അഭയ ഗ്രാമത്തിന് സമീപത്തെ തോട്ടിലാണ് പതിക്കുന്നത്. തോട് മലിനമാകുന്നതിൽ ജനങ്ങൾക്ക് ഉത്കണ്ഠയുണ്ട്. കുളിക്കുന്നതിനും തുണി അലക്കാനും കൃഷിക്കും ഈ തോട്ടിലെ വെള്ളമാണ് ഉപയോഗിക്കുന്നത്.

പ്രദേശത്തുള്ള നിരവധി കിണറുകളിലും മലിനജലം ഒഴുകി എത്തുന്നതിനാൽ കുടിവെള്ളവും മലിനമാകുന്നുണ്ടെന്നാണ് നാട്ടുകാരുടെ പരാതി. പഞ്ചായത്തിലും പൊലീസിലും പരാതി നൽകിയെങ്കിലും യാതൊരു പ്രയോജനവുമില്ലെന്നാണ് പ്രദേശവാസികൾ പറയുന്നത്.

മാലിന്യ നിർമ്മാർജ്ജനത്തിന് നിരവധി പദ്ധതികൾ ഉണ്ടായിട്ടും അതൊന്നും സ്വീകരിക്കാതെ മാലിന്യം വലിച്ചെറിയുന്നവർക്കെതിരെ ക‌ർശന നടപടികൾ അധികൃതർ സ്വീകരിച്ചില്ലെങ്കിൽ ശക്തമായ സമരപരിപാടികൾ സംഘടിപ്പിക്കും.

ബിജു പേയാട്

കോൺഗ്രസ് പേയാട് മണ്ഡലം കമ്മിറ്റി പ്രസിഡന്റ്.