തിരുവനന്തപുരം: ഗുണമേന്മയും ഔഷധഗുണമുള്ളതുമായ നാടൻ ഉത്പന്നങ്ങൾ വാങ്ങാൻ അവസരമൊരുക്കി ഗാന്ധി സെന്റർ ഫോർ റൂറൽ ഡെവലപ്‌മെന്റും കേരള ഗാന്ധി സ്‌മാരക നിധിയും. വൈ.എം.സി.എ ഹാളിൽ സംഘടിപ്പിച്ചിരിക്കുന്ന സ്വദേശി ഫെസ്റ്റിവലിൽ പ്രകൃതിദത്തമായ ഉത്പന്നങ്ങളുടെ പ്രദർശനത്തിനൊപ്പം നാടൻ ഉത്പന്നങ്ങളുടെ നിർമ്മാണ പരിശീലനവും സെമിനാറുമുണ്ടാകും.

ജാതിക്കാ ടോൺ,നെല്ലിക്കാ ജീരക കാന്താരി പാനീയം,പച്ചമാങ്ങാ കാന്താരി പാനീയം,പുളിഞ്ചിക്ക കൊളസ്‌ട്രോൺ നിവാരണി,ചക്ക പേഡ,ചക്ക വരട്ടി,ചക്ക കേക്ക്,ചക്ക അച്ചാർ,ചക്ക ജാം,ചക്ക ജെല്ലി,ചക്കക്കുരു അവലോസ്,തേൻനെല്ലിക്കാ,വിവിധയിനം സ്‌ക്വാഷുകൾ,വിവിധതരം നാടൻ അച്ചാറുകൾ,ചമ്മന്തിപ്പൊടികൾ,മായമില്ലാത്ത മസാലപ്പൊടികൾ,സോപ്പ്, ക്ലീനിംഗ് ലോഷൻ,ഷാംബു,പ്രമേഹരോഗികൾക്കായി ഉണക്കചക്കച്ചുള,ചക്കക്കുരു പൊടികൾ തുടങ്ങിയ മുന്നൂറിൽപരം നാടൻ ഉത്‌പന്നങ്ങളാണ് പ്രദർശനമേളയിലുള്ളത്. രാവിലെ 9 മുതൽ രാത്രി 9 വരെയാണ് പ്രദർശനം. ആഗസ്റ്റ് 4ന് അവസാനിക്കും.

പരിശീലനം

സ്വദേശി ഫെസ്റ്റിവലിനോടനുബന്ധിച്ച് വിവിധ പരിശീലനങ്ങളും സംഘടിപ്പിച്ചിട്ടുണ്ട്. ഇന്ന് ചക്ക ഉത്പന്ന നിർമ്മാണം,16,17ന് കറി മസാലപ്പൊടി നിർമ്മാണം,18,19ന് അച്ചാർ നിർമ്മാണം,20,21ന് കൂട നിർമ്മാണം, 22,23ന് പേപ്പർ ബാഗ് നിർമ്മാണം,24,25ന് പ്രകൃതികൃഷി പരിശീലനം,26,27,28ന് കേക്ക് നിർമ്മാണം, 29,30ന് കേക്ക് ഡെക്കറേഷൻ,31,1,2ന് ബേക്കറി സ്നാക്‌സ് നിർമ്മാണം, 3,4ന് മില്ലറ്റ്സ് പരിശീലനം. രാവിലെ 10 മുതൽ വൈകിട്ട് 4.30 വരെയാണ് പരിശീലനം നടക്കുക.