തിരുവനന്തപുരം: കാർഗിൽ യുദ്ധ വിജയത്തിന്റെ രജത ജൂബിലിയോടനുബന്ധിച്ച് പാങ്ങോട് സൈനിക കേന്ദ്രം സംഘടിപ്പിക്കുന്ന സൈക്കിൾ റാലി 54 ഇൻഫൻട്രി ഡിവിഷൻ ജനറൽ ഓഫീസർ കമാൻഡിംഗ് മേജർ ജനറൽ അഖിലേഷ് കുമാർ.എസ്.എം ഫ്ളാഗ് ഓഫ് ചെയ്തു. പാങ്ങോട് മിലിട്ടറി സ്റ്റേഷൻ കമാൻഡർ ബ്രിഗേഡിയർ സലിൽ.എം.പി, മറ്റ് ഉദ്യോഗസ്ഥർ, ജവാന്മാർ എന്നിവർ പങ്കെടുത്തു.

പാങ്ങോട് സൈനിക കേന്ദ്രത്തിലെ 10 സൈനികർ അടങ്ങുന്ന റാലി സംഘം രാമപുരത്തെ പരമവീരചക്ര ലഭിച്ച മേജർ രാമസ്വാമി പരണേശ്വരന്റെ പ്രതിമയിൽ ആദരാഞ്ജലികൾ അർപ്പിച്ചുകൊണ്ടാണ് യാത്ര തുടങ്ങിയത്. 26ന് പാങ്ങോട് യുദ്ധസ്മാരകത്തിൽ സമാപിക്കും.

കോട്ടയം, ആലപ്പുഴ, ചങ്ങനാശ്ശേരി, റാന്നി, പത്തനംതിട്ട, കൊട്ടാരക്കര, കൊല്ലം, കിളിമാനൂർ എന്നിവിടങ്ങളിലൂടെയാണ് റാലി കടന്നുപോകുന്നത്. യാത്രയ്ക്കിടെ റാലി അംഗങ്ങൾ വിമുക്തഭടൻമാരുടെ ക്യാന്റീനുകളും എക്സ് സർവീസ്‌മെൻ കോൺട്രിബ്യൂട്ടറി ഹെൽത്ത് സ്‌കീം (ഇ.സി.എച്ച്.എസ്) പോളിക്ലീനിക്കുകളും സന്ദർശിക്കും. 15 വീർ നാരികൾ/ വീർ മാതാക്കൾ/ വിധവകൾ/ യുദ്ധ സേനാനികൾ എന്നിവരുടെ വസതികളിലെത്തി അവരെ ആദരിക്കുകയും ചെയ്യും.

26ന് ഗവർണർ ആരിഫ് മുഹമ്മദ് ഖാൻ പാങ്ങോട് യുദ്ധസ്മാരകത്തിൽ പുഷ്പചക്രം അർപ്പിക്കും. തുടർന്ന് സൈക്കിൾ റാലി ടീമിന്റെ ഫ്ളാഗ് ഇൻ ചടങ്ങ് നടക്കും. സേനാംഗങ്ങളും വിമുക്തഭടന്മാരും പരിപാടിയിൽ പങ്കെടുക്കും.