തിരുവനന്തപുരം : എല്ലാ മാസവും ഏഴിനു മുമ്പ് ശമ്പളം നൽകുമെന്ന ഉറപ്പുകൾ ലംഘിച്ച കരാർ കമ്പനിയായ ഇ.എം.ആർ.ഐ ഗ്രീൻ ഹെൽത്ത് സർവീസിനെതിരെ 108 ആംബുലൻസ് ജീവനക്കാർ സമരം തുടങ്ങി.

കേരള സംസ്ഥാന 108 ആംബുലൻസ് എംപ്ലോയീസ് യൂണിയന്റെ നേതൃത്വത്തിലാണ് പ്രതിഷേധം.

ഒരു ആശുപത്രിയിൽ നിന്ന് മറ്റൊരു ആശുപത്രിയിലേക്കുള്ള (ഐ.എഫ്.ടി) കേസുകൾ എടുക്കാതെയാണ് പ്രതിഷേധിക്കുന്നത്. അടിയന്തര സേവങ്ങൾ മുടക്കില്ല. റോഡപകടങ്ങളിൽ പെട്ടവരെയും വീടുകളിൽ നിന്ന് രോഗികളെയും കുട്ടികളെയും ആശുപത്രികളിലെത്തിച്ചു. പ്രസവ കേസുകളും ഒഴിവാക്കിയില്ല. കഴിഞ്ഞ മാസത്തെ ശമ്പളം ഇതുവരെ നൽകാത്ത സാഹചര്യത്തിലാണ് സമരം.