ആറ്റിങ്ങൽ: ആറ്റിങ്ങൽ നഗരസഭയിൽ കൗൺസിലർമാർ രാജിവച്ചതിനെ തുടർന്ന് രണ്ട് വാർഡുകളിലേക്കുള്ള ഉപതിരഞ്ഞെടുപ്പിൽ മൂന്ന് മുന്നണികളും പ്രചാരണം ശക്തമാക്കി. പരസ്യപ്രചാരണം ഇന്ന് അവസാനിക്കും. 30 ന് വോട്ടെടുപ്പും 31 ന് വോട്ടെണ്ണലും നടക്കും. ചെറുവള്ളിമുക്ക്, തോട്ടവാരം വാർഡുകളിലാണ് ഉപതിരഞ്ഞെടുപ്പ് . ചെറുവള്ളിമുക്ക് വാർഡിൽ എം.എസ്.മഞ്ചു,തോട്ടവാരം വാർഡിൽ ജി. ലേഖയുമാണ് എൽ.ഡി.എഫ് സ്‌ഥാനാർത്ഥികൾ. ചെറുവള്ളിമുക്ക് വാർഡിൽ മുൻ കൗൺസിലർ എസ്.ശ്രീകലയും തോട്ടവാരം വാർഡിൽ ബി.നിഷയും യു.ഡി.എഫ് സ്‌ഥാനാർത്ഥികൾ. ചെറുവള്ളിമുക്ക് വാർഡിൽ ആർ.എസ്. മിനിയും, തോട്ടവാരം വാർഡിൽ വി. സ്വാതിയും ആണ് ബി.ജെ.പിക്കായി മത്സരിക്കുക. പാർലമെന്റ് തിരഞ്ഞെടുപ്പിന് ദിവസങ്ങൾ മുൻപാണ് ബി.ജെ.പി കൗൺസിലർമാരായ തോട്ടവാരം കൗൺസിലർ എ.എസ്. ഷീല, ചെറുവള്ളിമുക്ക് കൗൺസിലർ വി.പി. സംഗീതാറാണി എന്നിവർ രാജിവച്ചത്. 31 അംഗ നഗരസഭ ഭരണസമിതിയിൽ എൽ.ഡി.എഫ് 18, യു .ഡി.എഫ് 6, ബി.ജെ.പി 5 എന്നിങ്ങനെയാണ് കക്ഷിനില.