ടാറും മെറ്രലും ഇളകിത്തെറിച്ച് ദുരിതയാത്ര

വർക്കല: മൂന്ന് വർഷമായി തകർന്നുകിടക്കുകയാണ് ചെമ്മരുതി ഗ്രാമപഞ്ചായത്തിലെ വണ്ടിപ്പുര - കോവൂർ റോഡ്. പൊതുമരാമത്ത് വകുപ്പ് പുനർ നിർമ്മാണത്തിനായി ഇടിച്ചുനിരത്തിയ റോഡ് ഇനിയും ടാർ ചെയ്ത് സഞ്ചാരയോഗ്യമാക്കിയിട്ടില്ല.

നിലവിലുള്ള പഴയ ചെറിയ പാലം നവീകരണം നടത്തിയതിന്റെ പിന്നാലെയാണ് റോഡിന്റെ ടാറിംഗ് ആരംഭിക്കേണ്ടിയിരുന്നത്.എന്നാൽ പാലം പണി തീർന്നിട്ട് നാളുകളേറെയായെങ്കിലും റോഡിന്റെ നവീകരണ പ്രവൃത്തികൾ ആരംഭിച്ചിട്ടില്ല.

മുൻപ് കെ.എസ്.ആർ.ടി.സിയുടെ കോവൂർ ചാവർകോട് മുത്താന കല്ലമ്പലം സർവീസ് ഇതുവഴിയുണ്ടായിരുന്നു. എന്നാൽ റോഡിന്റെ അവസ്ഥ മോശമായതോടെ ഈ സർവീസും നിറുത്തി.ഇതോടെ പ്രദേശവാസികൾ അനുഭവിക്കുന്ന ബുദ്ധിമുട്ട് ചില്ലറയല്ല.വിദ്യാർത്ഥികൾക്ക് സ്കൂളിലേക്കും കോളേജിലേക്കുമൊക്കെ ബസിൽ പോകാൻ കഴിയാതായിട്ട് വർഷങ്ങളായി.

റോഡ് തകർന്നതോടെ സ്കൂൾ ബസുകൾ മറ്റ് വഴികളിലൂടെ ചുറ്റിത്തിരിഞ്ഞാണ് പോകുന്നത്.

നാട്ടുകാർക്കും യാത്രയ്ക്ക് മറ്റു വഴികൾ തേടേണ്ടിവരുന്നു.
കെട്ടിടം വാതിൽക്കൽ - പാളയംകുന്ന്,ഏണാറുവിള - പനയറ എന്നീ ഇടറോഡുകളുടെ നവീകരണവും വണ്ടിപ്പുര - കോവൂർ റോഡിന്റെ പുനർ നിർമ്മാണത്തോടൊപ്പമാണ് പൊതുമരാമത്ത് വകുപ്പ് നടത്തേണ്ടത്. പൊതുമരാമത്ത് വകുപ്പിന്റെ മേൽനോട്ടത്തിൽ നിർമ്മാണം കരാർ ചെയ്തിട്ടുള്ളതിനാൽ ചെമ്മരുതി ഗ്രാമപഞ്ചായത്തിനും റോഡ് നവീകരണത്തിൽ ഇടപെടാൻ കഴിയാത്ത സ്ഥിതിയാണ്.

അപകടം പതിവാകുന്നു

വെട്ടിപ്പൊളിച്ചിട്ട റോഡിൽ ടാറിംഗിനായി മെറ്റൽക്കൂന കൂട്ടിയിട്ട് മാസങ്ങൾ പിന്നിടുന്നു. ഇത് പലപ്പോഴും അപകടങ്ങൾക്കു വഴിതെളിച്ചിട്ടുണ്ട്. ഇരുചക്ര വാഹന യാത്രികർ തെന്നിവീണ് അപകടത്തിൽപ്പെടുന്നത് പതിവാണ്. സ്വകാര്യ വാഹനങ്ങൾക്കും യാത്രചെയ്യാൻ പ്രയാസം നേരിടുന്നുണ്ട്. പൊതുമരാമത്തു അധികൃതർ അടിയന്തരമായി വിഷയത്തിൽ ഇടപെട്ട് പരിഹാരം കാണണമെന്നാണ് നാട്ടുകാരുടെ ആവശ്യം.

ബസുമില്ല

പാലം പണിക്കും റോഡ് പുനർ നിർമ്മാണത്തിനുമായി റോഡ് അടച്ചതോടെ ഇതുവഴിയുണ്ടായിരുന്ന ബസ് സർവീസുകളും നിലച്ചു. കുണ്ടും കുഴിയും നിറഞ്ഞ റോഡിലൂടെ സർവീസ് നടത്താൻ കഴിയില്ലെന്നാണ് ബസുടമകൾ പറയുന്നത്.

ഓട്ടം വരില്ല

ഓട്ടോറിക്ഷകളും പലപ്പോഴും സവാരിക്കു വിളിച്ചാൽ വരാറില്ല. സ്‌ത്രീകളും വൃദ്ധരുമടക്കം കാൽനട യാത്രയായി കിലോ മീറ്ററുകൾ സഞ്ചരിക്കേണ്ടിവരുന്നു.

അധികൃതരുടെ അലംഭാവമാണ് റോഡുപണി ഇഴയാൻ കാരണം.രണ്ട് മാസം കൊണ്ട് റോഡുപണി പൂർത്തിയാക്കുമെന്ന പതിവ് പല്ലവി കേൾക്കാൻ തുടങ്ങിയിട്ട് മൂന്ന് വർഷമായി.

അനിൽ കോവൂർ, ചെമ്മരുതി ഗ്രാമപഞ്ചായത്ത് മുൻഅംഗം