ചേർത്തല: പോക്‌സോ കേസിൽ പ്രതിയായി 45 ദിവസമായി ഒളിവിൽ കഴിഞ്ഞിരുന്ന പ്രതിയെ ചേർത്തല പൊലീസ് പിടികൂടി. നഗരസഭ 15ാം വാർഡ് വള്ളപുരക്കൽ പ്രണവിനെ(32) ഊട്ടിക്കുസമീപം കോത്തഗിരിയിൽ നിന്നാണ് പൊലീസ് സാഹസികമായി പിടികൂടിയത്.കേസെടുത്തതറിഞ്ഞു മുങ്ങിയ പ്രതിയുടെ അകന്ന ബന്ധുക്കളെ കേന്ദ്രീകരിച്ചു നടത്തിയ അന്വേഷണത്തിലാണ് ഇയാളെ കണ്ടെത്തി സാഹസികമായി പിടികൂടിയത്. എസ്.ഐ എ.അനിൽകുമാറിന്റെ നേതൃത്വത്തിൽ സിവിൽ പൊലീസ് ഓഫീസർമാരായ സതീഷ്,അജയ്,മുരളീധരൻ,എം.ശ്രീജിത്ത്,ധൻരാജ്.ഡി.പണിക്കർ എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്.കുമളിയിലും തിരുപ്പൂരിലുമടക്കം അന്വേഷണം നടത്തി ഒടുവിലാണ് കോത്തഗിരിയിലെത്തിയത്.ഡിവൈ.എസ്.പിയുടെയും സ്റ്റേഷൻ ഓഫീസറുടെയും നിർദ്ദേശപ്രകാരമായിരുന്നു അന്വേഷണം.കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.