മാന്നാർ: അപകടം പതിയിരിക്കുന്ന കുരട്ടിക്കാട് റോഡുകളിലെ ഇടുങ്ങിയ കലുങ്കുകൾ നാട്ടുകാർക്ക് ഭീഷണിയാവുന്നു. തൃക്കുരട്ടി മഹാദേവ ക്ഷേത്രത്തിന്റെ തെക്കേ നടയിലൂടെ കടന്നുപോകുന്ന യൂണിയൻ ബാങ്ക് - തട്ടാരുകാവ് റോഡിലെയും കുറ്റിയിൽമുക്ക്-മിൽമ റോഡിലെയും കോയിക്കപ്പള്ളം തോട്ടുമുഖപ്പ് കടവ് തോടിനു കുറുകെ സ്ഥിതി ചെയ്യുന്ന , ഇടുങ്ങിയ കലുങ്കുകളാണ് അപകട ഭീഷണിയായി മാറിയിരിക്കുന്നത്. മാന്നാർ ഗ്രാമപഞ്ചായത്ത് അഞ്ച്, ആറ്, ഏഴ്, പതിനേഴ് വാർഡുകളുടെ അതിർത്തിയിലാണ് യൂണിയൻ ബാങ്ക് - തട്ടാരുകാവ് റോഡിലെ കലുങ്ക് സ്ഥിതി ചെയ്യുന്നത്. ഈ റോഡിലൂടെ നിരവധി വാഹനങ്ങളാണ് ദിനംപ്രതി കടന്നുപോകുന്നത്. കലുങ്കിന്റെ ഭാഗത്ത് ചെറിയ വളവുള്ളതിനാൽ എതിരെ വരുന്ന വാഹനങ്ങളെ കാണാൻ കഴിയാത്തതിനാൽ അപകടങ്ങളും പതിവാകുന്നു. റോഡിന്റെ വശങ്ങളിൽ നീരൊഴുക്ക് സ്ഥിരമായതിനാൽ കാൽനടയാത്രക്കാർക്കും ഏറെ ബുദ്ധിമുട്ടാണ്. മാന്നാർ ഗ്രാമപഞ്ചായത്ത് ഏഴ്, പതിനേഴ് വാർഡുകളിലെ കടന്നു പോകുന്ന കുറ്റിയിൽമുക്ക് - മിൽമ റോഡിലെ കലുതിയിൽ കലുങ്കിന്റെ സംരക്ഷണഭിത്തി തകർന്നിട്ട് വർഷങ്ങളായി. പല അപകടങ്ങൾ ഇവിടെ ഉണ്ടായിട്ടും അധികൃതർ യാതൊരു നടപടിയും സ്വീകരിച്ചിട്ടില്ലെന്നാണ് നാട്ടുകാരുടെ ആക്ഷേപം. സംരക്ഷണഭിത്തി ഇല്ലാത്തതിനാൽ കനാലിലേക്ക് വീണ് അപകടം സംഭവിക്കാൻ സാധ്യത ഏറെയാണ്. മുമ്പുണ്ടായ ഒരു അപകടത്തെ തുടർന്ന് കലുങ്കിന്റെ ഒരു വശത്ത് ഇരുമ്പ് പൈപ്പ് ഉപയോഗിച്ച് സംരക്ഷണവേലി കെട്ടിയിട്ടുണ്ടെങ്കിലും അതത്ര സുരക്ഷിതമല്ല. കുറ്റിയിൽമുക്ക്- മുതൽ പുളിക്കാശ്ശേരി ജംഗ്ഷൻ വരെയുള്ള റോഡിന്റെ അവസ്ഥയും ശോചനീയമാണ്. കാലപ്പഴക്കത്താൽ കൽകെട്ടുകൾ ഇളകിയും സംരക്ഷണ ഭിത്തികൾ തകർന്നും ദുർബലാവസ്ഥയിലായ ഇരു കലുങ്കുകളും വീതികൂട്ടി പുനർനിർമ്മിക്കണമെന്നാണ് നാട്ടുകാരുടെ ആവശ്യം.

.......

"മാവേലിക്കര ബ്ലോക്ക് പഞ്ചായത്തിന്റെ രണ്ട് ഡിവിഷനുകളുടെ അതിർത്തിയിലുള്ള യൂണിയൻ ബാങ്ക് - തട്ടാരുകാവ് റോഡിലെ കലുങ്ക് വീതികൂട്ടി പുനർനിർമ്മിക്കുന്നതിന് വലിയ ഫണ്ട് വേണ്ടതിനാൽ, ബ്ലോക്ക് പഞ്ചായത്തംഗങ്ങൾക്ക് റിക്വസ്റ്റ് നൽകിയിട്ടുണ്ട്. റോഡിന്റെ വശത്തെ വെള്ളക്കെട്ട് ഒഴിവാക്കുന്നതിനായി ഓട നിർമ്മിക്കുന്നതിനും കുറ്റിയിൽമുക്ക് - മിൽമ റോഡിലെ കലുതിയിൽ കലുങ്കിന്റെ കിഴക്കു ഭാഗം റോഡ് ടാർ ചെയ്യുന്നതിനും ഗ്രാമപഞ്ചായത്തിൽ പദ്ധതി സമർപ്പിച്ചിട്ടുണ്ട്.
(സുജിത് ശ്രീരംഗം, മാന്നാർ ഗ്രാമപഞ്ചായത്ത് ഏഴാം വാർഡ് അംഗം)

"യൂണിയൻ ബാങ്ക് - തട്ടാരുകാവ് റോഡിലെ കലുങ്ക് ഏറെ അപകട ഭീഷണി ഉയർത്തുന്നതിനാൽ വീതികൂട്ടി പുനർനിർമിക്കുന്നതിനായി ജില്ലാ-ബ്ലോക്ക് പഞ്ചായത്തുകളുടെ ഫണ്ടിനായുള്ള ശ്രമങ്ങൾ നടത്തിവരികയാണ്. കലുങ്കിന്റെ കിഴക്കു നിന്നും കുരട്ടിക്കാട് ഭാഗം വരെയുള്ള റോഡിന്റെ പുനർനിർമ്മാണത്തിനായി ഗ്രാമപഞ്ചായത്തിൽ പദ്ധതി സമർപ്പിച്ചിട്ടുണ്ട്.
(സലിം പടിപ്പുരയ്ക്കൽ, മാന്നാർ ഗ്രാമപഞ്ചായത്ത് ആറാം വാർഡ് അംഗം)