ഓൺലൈൻ അപേക്ഷ 17 വരെ
ആലപ്പുഴ: തദ്ദേശസ്വയംഭരണ സ്ഥാപനങ്ങളുമായി ബന്ധപ്പെട്ട പരാതികൾ തീർപ്പാക്കുന്നതിനായി തദ്ദേശസ്വയംഭരണ വകുപ്പു മന്ത്രി എം.ബി.രാജേഷിന്റെ അദ്ധ്യക്ഷതയിൽ തദ്ദേശ അദാലത്ത് 22ന് രാവിലെ 8.30ന് ആലപ്പുഴ എസ്.ഡി.വി. സെന്റിനറി ഹാളിൽ നടക്കും. തദ്ദേശസ്വയംഭരണ സ്ഥാപനങ്ങളിൽ അപേക്ഷ നൽകിയതും എന്നാൽ സമയപരിധിക്കകം സേവനം ലഭിക്കാത്തതുമായ പരാതികൾ, വകുപ്പ് മന്ത്രിക്ക് ലഭിച്ച നിവേദനങ്ങൾ, തദ്ദേശസ്വയംഭരണ സ്ഥാപനങ്ങളുമായി ബന്ധപ്പെട്ട പുതിയ പരാതികൾ, നിർദ്ദേശങ്ങൾ എന്നിവയാണ് പരിഗണിക്കുക.

ബിൽഡിംഗ് പെർമിറ്റ് കംപ്ലീഷൻ ക്രമവത്കരണം, വാണിജ്യ വ്യാപാര സേവന ലൈസൻസുകൾ,സിവിൽ രജിസ്ട്രേഷൻ,നികുതികൾ,
ഗുണഭോക്തൃ പദ്ധതികൾ,പദ്ധതി നിർവഹണം,സാമൂഹ്യ സുരക്ഷാ പെൻഷൻ,മാലിന്യ സംസ്‌കരണം,പൊതുസൗകര്യങ്ങളും പൊതുസുരക്ഷയും,ആസ്തി മാനേജ്മെന്റ്,സ്ഥാപനങ്ങളുടെയും സംവിധാനങ്ങളുടെയും സൗകര്യങ്ങളുടെയും കാര്യക്ഷമത തുടങ്ങിയ വിഷയങ്ങൾ പരിഗണിക്കും.adalat.lsgkerala.gov.in എന്ന വെബ്സൈറ്റിലൂടെ ഓൺലൈനായോ തദ്ദേശസ്ഥാപനങ്ങളിൽ നേരിട്ടോ പരാതി നൽകാം. ഓൺലൈൻ അപേക്ഷ 17 വരെ നൽകാം. അദാലത്ത് ദിവസം നേരിട്ടെത്തിയും പരാതി നൽകാം.

പരിഗണിക്കാത്ത വിഷയങ്ങൾ
വീട് അനുവദിക്കുന്നതുമായി ബന്ധപ്പെട്ട അപേക്ഷകൾ,സർക്കാർ ഉദ്യോഗസ്ഥരുടെ ജീവനകാര്യം,അതിദാരിദ്ര്യ പട്ടികയിൽ ഉൾപ്പെടുത്തുന്നത് സംബന്ധിച്ച കാര്യങ്ങൾ.