കായംകുളം : പത്തനാപുരം ഗാന്ധിഭവൻ ജില്ലയിലെ ഭിന്നശേഷി വിഭാഗക്കാർക്ക് വേണ്ടി നടത്തുന്ന ഭിന്നശേഷി കലോത്സവം 22 ,23 തീയതികളിൽ കായംകുളം ടി.എ കൺവെൻഷൻ സെന്ററിൽ നടക്കും .ജില്ലയിൽ നിന്ന് രജിസ്റ്റർ ചെയ്ത എട്ട് സ്പെഷ്യൽ സ്കൂളുകളിൽ നിന്നും രണ്ട് ബ്ലോക്ക് റിസോഴ്‌സ് സെന്ററുകളിൽ നിന്നുമായി ഇരുനൂറിലധികം പേർ പങ്കെടുക്കും.

22ന് രാവിലെ മന്ത്രി ആർ.ബിന്ദു ഉദ്ഘാടനം നിർവഹിക്കും. ഗാന്ധിഭവൻ സെക്രട്ടറി ഡോ.പുനലൂർ സോമരാജൻ അദ്ധ്യക്ഷത വഹിക്കും.യു.പ്രതിഭ.എം.എൽ.എ , ചലച്ചിത്ര താരം രശ്മി അനിൽ, ദേവികുളങ്ങര പഞ്ചായത്ത് പ്രസിഡന്റ് എസ്. പവനനാഥൻ,പാലമുറ്റത്ത് വിജയകുമാർ,എ.ജെ.ഷാജഹാൻ ,എസ്.കേശുനാഥ്‌ എന്നിവർ പങ്കെടുക്കും. 23 ന് രാവിലെ പത്തിന് നടക്കുന്ന കലാമേളയ്ക്ക് പാരാഒളിമ്പിക്സ് വിന്നർ ആസിം വെളിമണ്ണ ,വീൽചെയറിൽ ഇരുന്നു ഏഴ് ഭാഷകളിൽ സിനിമ സംവിധാനം ചെയ്ത അലൻ വിക്രാന്ത് ,സർവ്വ ശ്രേഷ്‌ഠ ദിവ്യാഗ് പുരസ്‌ക്കാര ജേതാവ് ആദിത്യ സുരേഷ് ,കൈരളി ഫീനിക്സ് അവാർഡ് ജേതാവ് മുഹമ്മദ് യാസീൻ എന്നിവർ തിരിതെളിക്കും.

വൈകിട്ട് നാലിന് നടക്കുന്ന സമാപന സമ്മേളനത്തിൽ മലങ്കര കാതോലിക്കാ മാവേലിക്കര രൂപത അധ്യക്ഷൻ ഡോ.ജോഷ്വാ മാർ ഇഗ്നാത്തിയോസ്‌ അദ്ധ്യക്ഷത വഹിക്കും ജസ്റ്റിസ് ബി.കെമാൽ പാഷ ഉദ്ഘാടനം നിർവഹിക്കും.നിയുക്ത ഭിന്ന ശേഷി കമ്മീഷണർ ഡോ.പി.റ്റി.ബാബുരാജ് മുഖ്യാതിഥിയാകും.

അംഗങ്ങളായ എ. ജെ. ഷാജഹാൻ, എസ്. പവനനാഥൻ, എസ്. കേശുനാഥ്‌, ഗാന്ധിഭവൻ ഓർഗാനൈസിങ് സെക്രട്ടറി മുഹമ്മദ്‌ ഷെമീർ എന്നിവർ പത്രസമ്മേളനത്തിൽ പങ്കെടുത്തു.