ഹരിപ്പാട് : കാർട്ടൂൺ ചാനൽ റീചാർജ് ചെയ്ത് കൊടുക്കാത്തതിന്റെ മനോവിഷമത്തിൽ ജീവനൊടുക്കാൻ ശ്രമിച്ച് ചികിത്സയിലായിരുന്ന നാലാം ക്ലാസ് വിദ്യാർത്ഥി മരിച്ചു. ഹരിപ്പാട് മുട്ടം എവിളയിൽ ബാബു - കല ദമ്പതികളുടെ മകൻ കാർത്തിക് (9) ആണ് മരിച്ചത്. കഴിഞ്ഞ ഞായറാഴ്ച തൂങ്ങി​ മരി​ക്കാൻ ശ്രമി​ച്ച കാർത്തി​ക് തിരുവല്ലയിലെ സ്വകാര്യ ആശുപത്രിയിൽ ചി​കി​ത്സയി​ലി​രി​ക്കെ വെള്ളിയാഴ്ച രാത്രിയോടെയാണ് മരി​ച്ചത്.

ഞായറാഴ്ച ഉച്ചയോടെ, വീട്ടി​ൽ നി​ന്ന് കുറച്ചകലെ അമ്മ കല നടത്തുന്ന ഇസ്തി​രി​ക്കടയി​ൽ ചോറുമായി​ ജ്യേഷ്ഠനും ആറാം ക്ളാസ് വി​ദ്യാർത്ഥി​യുമായ കൗശി​കി​നൊപ്പം എത്തി​യ കാർത്തി​ക് ചാനൽ ചാർജ് ചെയ്ത് തരാൻ അമ്മയോട് ആവശ്യപ്പെട്ടു. എന്നാൽ പോയി​ പഠി​ക്കാൻ പറഞ്ഞ കല വൈകി​ട്ട് റീചാർജ് ചെയ്ത് തരാമെന്നും അറി​യി​ച്ചു. തുടർന്ന് കാർത്തി​ക് മടങ്ങുകയും വീടി​നോട് ചേർന്നുള്ള ഷെഡി​ൽ ആത്മഹത്യയ്ക്ക് ശ്രമിക്കുകയുമായിരുന്നു. കുളി​ക്കുകയായി​രുന്ന മുത്തശ്ശൻ ചെല്ലപ്പൻ ശബ്ദം കേട്ട് വന്ന് നോക്കി​യപ്പോൾ കാർത്തിക് ജനൽ കമ്പിയിൽ സാരിയിൽ തൂങ്ങി നിൽക്കുന്നതാണ് കണ്ടത്. ചെല്ലപ്പൻ ബഹളം വച്ചതി​നെത്തുടർന്ന് ഓടി​യെത്തി​യ പരി​സരവാസി​കളാണ് ആദ്യം മാവേലി​ക്കര താലൂക്ക് ആശുപത്രി​യി​ൽ എത്തി​ച്ചത്. പി​ന്നീട് തി​രുവല്ലയി​ലെ ആശുപത്രി​യി​ലേക്ക് മാറ്റി. കരീലക്കുളങ്ങര പൊലീസ് നടപടി സ്വീകരിച്ചു. സംസ്കാരം വീട്ടുവളപ്പി​ൽ നടന്നു. മുട്ടം എധീന സ്കൂളിലെ നാലാം ക്ലാസ് വിദ്യാർത്ഥിയായിരുന്നു കാർത്തി​ക്. അങ്കണവാടി​ വി​ദ്യാർത്ഥി​നി​യായ കൃതി​കയാണ് ഇളയ സഹോദരി​. ഗൾഫി​ൽ ഡ്രൈവറായ ബാബു വിവരമറിഞ്ഞ് നാട്ടി​ലെത്തി.