ആലപ്പുഴ : സംസ്ഥാനത്ത് കൺസ്യൂമർഫെഡിന്റെ ഓണം വിപണി അടുത്തമാസം ഏഴിന് ആരംഭിക്കും. ഏഴുദിവസം വരെ ന്യായവില വിപണന കേന്ദ്രങ്ങൾ പ്രവർത്തിക്കും. സംസ്ഥാനത്ത് 1500 വിപണന കേന്ദ്രമാണ് തുറക്കുന്നത്. ഇതിൽ 159 ത്രിവേണികളും 1341 സഹകരണ സംഘങ്ങളിലുമാണ് പ്രത്യേക വിപണന കേന്ദ്രങ്ങൾ തുറക്കുന്നത്. ജില്ലയിൽ 104 ന്യായവില ചന്തകളും തുറക്കും. ഇതിൽ 14 ത്രിവേണികളും 90 സഹകരണ സംഘങ്ങളുമാണ് വിപണന കേന്ദ്രങ്ങൾ തുറക്കുന്നത്.

ആന്ധ്ര ജയ അരി, കുറുവ അരി, മട്ട അരി, പച്ചരി, പഞ്ചസാര, ഉഴുന്ന്, ചെറുപയർ, കടല, തുവരപ്പരിപ്പ്, വൻപയർ, മുളക്, മല്ലി, വെളിച്ചെണ്ണ എന്നിങ്ങനെ 13 ഇന നിത്യോപയോഗ സാധനങ്ങൾ പൊതുവിപണിയെക്കാൾ 30 മുതൽ 50ശതമാനം വരെയും വിലക്കിഴിവിൽ ലഭിക്കും. നോൺ-സബ്സിഡി ഇനങ്ങൾക്ക് 10 മുതൽ 40 ശതമാനം വരെ വിലക്കുറവുണ്ട്.

ത്രിവേണി തേയില, ബിരിയാണി അരി, ഡാൽഡ, ആട്ട, മൈദ, റവ, അരിപ്പൊടികൾ, സേമിയ, പാലട, അരിയട, ചുവന്നൂള്ളി, സവാള എന്നിവയും പ്രത്യേകം വിലക്കുറവിൽ ലഭ്യമാകും. നിത്യോപയോഗ സാധനങ്ങളുടെ ഗുണ നിലവാരം ഉറപ്പാക്കിയാണ് വിപണിയിൽ എത്തിച്ചിട്ടുള്ളത്. ഓരോ ജില്ലയിലും ഒരോ കേന്ദ്രങ്ങളാണ് ഉണ്ടാവുക. ദിവസേന ആദ്യമെത്തുന്ന 100 പേർക്കാണ് സബ്സിഡിയോടെ നിത്യോപയോഗ സാധനങ്ങൾ ലഭ്യമാക്കുക. തിരക്ക് ഒഴിവാക്കാൻ സമയമെഴുതിയ കൂപ്പൺ നൽകും.

ത്രിവേണിസ്റ്റോറുകൾ സജ്ജം

 സംസ്ഥാനത്തെ 159 ത്രിവേണിസ്റ്റോറുകൾ, 27മൊബൈൽ ത്രിവേണിസ്റ്റോറുകൾ വഴിയും പൊതു മാർക്കറ്റിനേക്കാൾ വില കുറച്ച് നിത്യോപയോഗ സാധനങ്ങൾ ലഭിക്കും

 ത്രിവേണി സൂപ്പർ മാർക്കറ്റുകൾ, കൺസ്യൂമർ ഫെഡിന്റെ സഹകരണ സ്റ്റോറുകൾ, പ്രാഥമിക കാർഷിക സഹകരണസംഘങ്ങൾ, പട്ടിക ജാതി പട്ടിക വർഗ സംഘങ്ങൾ, മത്സ്യ സഹകരണ സംഘങ്ങൾ എന്നിവിടങ്ങളിലാണ് ന്യായവില ചന്ത തുറക്കുക.

ജില്ലയിൽ പ്രതീക്ഷിക്കുന്ന വിൽപ്പന

സബ്സിഡി : ₹8കോടി

നോൺസബ്സിഡി : ₹10 കോടി

സബ്‌സിഡി സാധനങ്ങൾ

( ഇനം, അളവ്, വില )

1. ജയ അരി...........8കിലോ..............232

2. കുറുവ അരി......8കിലോ..............240
3. കുത്തരി............8കിലോ...............240
4. പച്ചരി................. 2കിലോ................52
5. പഞ്ചസാര........ ഒരുകിലോ............27
6. ചെറുപയർ.... ഒരുകിലോ...............92
7. വൻകടല........ ഒരുകിലോ................69
8. ഉഴുന്ന്............. ഒരുകിലോ...............95
9. വൻപയർ........ ഒരുകിലോ...............75
10. തുവരപ്പരിപ്പ്...ഒരുകിലോ..............111
11. മുളക്.............. 500ഗ്രാം...................75
12. മല്ലി.................. 500ഗ്രാം...................39
13. വെളിച്ചെണ്ണ.... 500ഗ്രാം..................55