# ഏഴ് ലക്ഷത്തോളം രൂപയുടെ നഷ്

അമ്പലപ്പുഴ: നീർക്കുന്നത്ത് വെളിച്ചെണ്ണ നിർമ്മാണ സ്ഥാപനത്തിന് തീപിടിച്ചു. നീർക്കുന്നം ജംഗ്ഷന് സമീപം പ്രവർത്തിക്കുന്ന കേരാ ദിൻ എന്ന സ്ഥാപനത്തിലാണ് ഇന്നലെ ഉച്ചയോടെ തീപിടിത്തമുണ്ടായത്. ഏഴ് ലക്ഷത്തോളം രൂപയുടെ നഷ്ടം വന്നതായിട്ടാണ് പ്രഥമിക നിഗമനം.

കൊപ്രാ ഉണക്കുന്ന ഡ്രയറിന്റെ ഗ്യാസ് സിലിണ്ടറിലുണ്ടായ ചോർച്ചയാണ് തീപിടിക്കാൻ കാരണം. കടയിലുണ്ടായിരുന്ന ഉടമ പി.കെ.രാജീവും ജീവനക്കാരി സൂര്യയും പുറത്തേക്കിറങ്ങി രക്ഷപ്പെട്ടു. തുടർന്ന് നാട്ടുകാരുടെ നേതൃത്വത്തിൽ തീയണക്കാൻ ശ്രമം നടത്തിയെങ്കിലും പുക കാരണം അടുത്തേക്ക് ചെല്ലാൻ കഴിഞ്ഞില്ല. പിന്നീട് ആലപ്പുഴ,​ തകഴി എന്നിവിടങ്ങളിൽ നിന്നായി അഞ്ച് യൂണിറ്റ് ഫയർ ഫോഴ്സെത്തി കടയുടെ ചില്ല് തകർത്താണ് രക്ഷാപ്രവർത്തനം നടത്തിയത്. ഫയർഫോഴ്സും അമ്പലപ്പുഴ പൊലീസും നാട്ടുകാരും ചേർന്ന് 2 മണിക്കൂറോളം നടത്തിയ പരിശ്രമത്തിനൊടുവിലാണ് തീ പൂർണമായും അണയ്ക്കാൻ കഴിഞ്ഞത്. ഒന്നേമുക്കാൽ ലക്ഷത്തോളം രൂപയുടെ കൊപ്ര, വെളിച്ചെണ്ണ, യന്ത്രസാമഗ്രികൾ എന്നിവയടക്കം കത്തി നശിച്ചു. 7ലക്ഷം രൂപയുടെ നഷ്ടം കണക്കാക്കുന്നു. സ്ഥാപനം മോടിപിടിപ്പിച്ച് ഒരാഴ്ച മുമ്പാണ് വീണ്ടും പ്രവർത്തനമാരംഭിച്ചത്.