ആലപ്പുഴ: ആഗോള റീട്ടെയിൽ ഭീമനായ വാൾമാർട്ടിന്റെ ഓൺലൈൻ വിപണിയിലേക്ക് കയർ കോർപ്പറേഷന്റെ ഉത്പന്നങ്ങൾ എത്തുന്നു. വാൾമാർട്ടിനുള്ള കയർ ഉത്പന്നങ്ങളുടെ ആദ്യ കണ്ടെയ്‌നറിന്റെ ഫ്ളാഗ് ഓഫ് വ്യവസായ മന്ത്രി പി. രാജീവ് നിർവഹിച്ചു. ഒന്നരകോടി രൂപയുടെ ഉത്പന്നങ്ങളാണ് വാൾമാർട്ടിന്റെ ഓൺലൈൻ മാർക്കറ്റിലേക്ക് ആദ്യ ഘട്ടത്തിൽ നൽകുന്നത്. ഡിസംബറിൽ അടുത്ത കണ്ടെയ്‌നർ അയക്കും. നേരിട്ട് ഷോറൂമിലേക്ക് തന്നെ ഉൽപ്പന്നങ്ങൾ എത്തിക്കുന്നതാണ് അടുത്ത ഘട്ടം.
വാൾമാർട്ടിന്റെ വാങ്ങൽ താത്പര്യം കയറിന്റെ രാജ്യാന്തര വിപണിയിലെ വലിയ മുന്നേറ്റമാണെന്ന് പി.രാജീവ് പറഞ്ഞു. ഉത്പന്നങ്ങളുടെ ഗുണമേന്മയിൽ വിട്ടുവീഴ്ച നടത്താതെ മുന്നേറണമെന്ന് അദ്ദേഹം പറഞ്ഞു. വൈവിദ്ധ്യമാർന്ന ഉത്പ്പന്നങ്ങൾ തയ്യാറാക്കാൻ തൊഴിലാളികൾക്ക് നൽകുന്ന പരിശീലന പദ്ധതിയിൽ മൂന്ന് ബാച്ച് പുറത്തിറങ്ങി. 500 പേർക്കാണ് പരിശീലനം നൽകുന്നത്.
ഇതോ‌ടൊപ്പം കയർ ആൻഡ് ക്രാഫ്റ്റ് ഷോറൂം ഉദ്ഘാടനവും, പരമ്പരാഗത ഉത്പ്പന്നങ്ങൾ നിർമ്മിക്കുന്നതിന് പരിശീലനം നേടിയ തൊഴിലാളികൾക്കുള്ള സർട്ടിഫിക്കറ്റ് വിതരണവും നടന്നു.
വയനാടിന് സഹായമായി മുഖ്യമന്ത്രിയുടെ ദുരിതാശ്വാസ നിധിയിലേക്ക് 10 ലക്ഷം രൂപ മന്ത്രി പി രാജീവിന് കോർപ്പറേഷൻ കൈമാറി. എം.എൽ.എമാരായ പി.പി.ചിത്തരഞ്ജൻ , എച്ച്.സലാം, ആലപ്പുഴ നഗരസഭാദ്ധ്യക്ഷ കെ.കെ.ജയമ്മ, കയർകോർപ്പറേഷൻ ചെയർമാൻ ജി.വേണുഗോപാൽ, കയർവകുപ്പ് പ്രിൻസിപ്പൽ സെക്രട്ടറി എ.പി.എം.മുഹമ്മദ് ഹനീഷ്, കയർ കോർപ്പറേഷൻ മുൻചെയർമാൻ ആർ.നാസർ, കയർവകുപ്പ് ഡയറക്ടർ ആനി ജൂലാ തോമസ്, ബി.പി.ടി എക്‌സിക്യൂട്ടീവ് ചെയർമാൻ കെ.അജിത്ത് കുമാർ, കയർകോർപ്പറേഷൻ മാനേജിംഗ് ഡയറക്ടർ ഡോ.പ്രതീഷ് ജി.പണിക്കർ തുടങ്ങിയവർ പങ്കെടുത്തു.