മാന്നാർ : പരുമല മണ്ഡലം കോൺ​ഗ്രസ് കമ്മി​റ്റി​ പ്രസി​ഡന്റ് സ്ഥാനത്തേക്ക് തി​രി​ച്ചെത്തി​ ശിവദാസ് യു.പണി​ക്കർ. കടപ്ര മണ്ഡലം കമ്മറ്റിയെ പരുമല, കടപ്ര എന്നിങ്ങനെ രണ്ട് മണ്ഡലം കമ്മറ്റികളാക്കി വി​ഭജി​ച്ചപ്പോൾ പരുമലയി​ൽ ആദ്യ പ്രസി​ഡന്റായി​ ശിവദാസ് യു.പണി​ക്കരെയാണ് നി​യമി​ച്ചത്. എന്നാൽ ആറുമാസം തി​കയും മുമ്പേ അദ്ദേഹം രാജി​വച്ചി​രുന്നു. കഴിഞ്ഞ മൂന്ന് വർഷത്തിനുള്ളിൽ ആറ് പ്രസിഡന്റുമാരാണ് ഇവി​ടെ ഉണ്ടായത്.

ശി​വദാസ് രാജി​വച്ചപ്പോൾ ഗോപി ഉലവത്ത് പറമ്പിലിനെയാണ് പ്രസിഡന്റാക്കി​യത്. ഇദ്ദേഹത്തെ അംഗീകരിക്കുവാൻ പരുമലയിലെ ബഹുഭൂരിപക്ഷം പ്രവർത്തകരും തയ്യാറാകാതി​രുന്നതോടെ പിന്നീട് മോഹനൻ ചാമക്കാലയെ പ്രസിഡന്റായി നിയമിച്ചു. ഇതി​നി​ടയി​ൽ പുനഃസംഘടന വന്നതോടെ മോഹനനെ മാറ്റി തോമസ് സാം പ്രസിഡന്റായി. കഴിഞ്ഞ പഞ്ചായത്ത് തിരഞ്ഞെടുപ്പിൽ യു.ഡി.എഫ് സ്ഥാനാർത്ഥിക്കെതിരെ ഭാര്യയെ മത്സരിപ്പിച്ച് പാർട്ടിയിൽ നിന്ന് പുറത്താക്കിയ ആളായതിനാൽ സാമിനെതിരെ പാർട്ടിയിൽ കലാപക്കൊടി ഉയർന്നതോടെ ലോക്സഭാ തിരഞ്ഞെടുപ്പിന് മുന്നോടിയായി പരുമല മണ്ഡലം കമ്മറ്റി തന്നെ പിരിച്ച് വിടുകയും ഇവിടുത്തെ ചുമതല കsപ്ര മണ്ഡലം പ്രസിഡന്റ് തോമസ് പി.വർഗീസിന് നൽകുകയും ചെയ്തു. പ്രവർത്തനങ്ങൾ കൂടുതൽ കാര്യക്ഷമമാക്കാൻ പരുമലക്ക് പുതിയ മണ്ഡലം പ്രസിഡന്റ് വേണമെന്ന ആവശ്യം ശക്തമായതോടെ കഴിഞ്ഞ ദിവസം പ്രസിഡന്റായി ശിവദാസ് യു.പണിക്കരെ വീണ്ടും പ്രഖ്യാപിക്കുകയായിരുന്നു.