മുഹമ്മ: ഓണപ്പാട്ടുകളും വട്ടക്കളിപ്പാട്ടുകളുമായി നാടുനീളെ സഞ്ചരിച്ച് ആളുകളെ ഓണാവേശത്തിലും നൃത്തച്ചുവടുകളിലും എത്തിക്കുന്നതിൽ ആശാനായിരുന്നു കഴിഞ്ഞ ദിവസം നിര്യാതനായ മുഹമ്മ ആര്യക്കര മറ്റത്തിൽ എം.കെ.രാജപ്പൻ (75)​. ചിങ്ങനിലാവിന്റെ മനോഹാരിതയും തുമ്പപ്പൂവിന്റെ നൈർമ്മല്യവും ചടുല താളവുംകൊണ്ട് സമ്പന്നമായിരുന്ന ആശാന്റെയും സംഘത്തിന്റെയും കൈകൊട്ടിക്കളിപ്പാട്ടുകൾ.

ഓണത്തെവും അസമത്തവും ശ്രീ നാരായണഗുരുവും മാത്രമല്ല,​ മിന്നാമിനുങ്ങും കാക്കയും കുയിലുമെല്ലാം അദ്ദേഹത്തിന്റെ പാട്ടുകൾക്ക് വിഷയമായി. ഇരുപതിലധികം വട്ടക്കളിപ്പാട്ടുകൾ അദ്ദേഹം എഴുതി ചിട്ടപ്പെടുത്തിയിട്ടുണ്ട്.
ജന്മനാഒരു കൈയ്ക്കും ഒരു കാലിനും സ്വാധീനമില്ലാത്ത രാജപ്പൻ അശാൻ,​ മറ്റെകൈ തലയ്ക്കു മീതെ ഉയർത്തി പാടുമ്പോൾ,​ വട്ടക്കളിക്കാർ അത് ഏറ്റുപാടിക്കളിക്കുമ്പോൾ കാണികൾ ആവേശത്തിലാകും.

രാജപ്പൻ നല്ലൊരു നിലത്തെഴുത്താശാൻ കൂടിയായിരുന്നു. 1967-ൽ പത്താം ക്ലാസ് കഴിഞ്ഞ് തൊഴിലില്ലാതെ നിൽക്കുമ്പോഴായിരുന്നു

ഗോവിന്ദനാശാൻ തന്റെ കളരി അദ്ദേഹത്തിന് കൊടുത്തത്. അങ്ങനെ ആ കളരി രാജപ്പനാശാന്റെ ജീവിതമാർഗ്ഗമായി. നൂറു കണക്കിന് കുട്ടികൾക്ക് അദ്ദേഹം അക്ഷരജ്ഞാനം പകർന്നു നൽകി. അവരിൽ പലരും വിദേശത്ത് ഉൾപ്പടെ നല്ല നിലയിൽ ജീവിക്കുന്നു. അസുഖം കാരണം വീട്ടിൽ ചികിത്സയിലും വിശ്രമത്തിലുമായിരുന്ന രാജപ്പനാശാൻ,​ മാനം തെളിഞ്ഞ് ഓണ നിലാവ് പരന്നപ്പോൾ തന്നെ മറഞ്ഞത് ശിഷ്യരെയും നാട്ടുകാരെയും ഒരുപോലെ വേദനിപ്പിക്കുന്നുണ്ട്. ചിന്മയ ദേവിയാണ് ഭാര്യ. മകൻ: അഭിലാഷ്. മരുമകൾ: ലക്ഷ്മി (ഇരുവരും കാനഡ).