പറവൂർ: ശ്രീനാരായണഗുരുദേവന്റെ 170-ാം ജയന്തി ഭക്തിസാന്ദ്രമാക്കാൻ എസ്.എൻ.ഡി.പി യോഗം പറവൂർ യൂണിയന്റെ നേതൃത്വത്തിൽ നടക്കുന്ന ശ്രീനാരായണ ദിവ്യജ്യോതി പര്യടനത്തിന്റെ ഉദ്ഘാടനം ഇന്ന് വൈകിട്ട് അഞ്ചിന് യൂണിയൻ ഓഡിറ്റോറിയത്തിൽ മന്ത്രി കെ. രാജൻ നിർവഹിക്കും. 72 ശാഖായോഗങ്ങളിലായി 13 മുതൽ 17 വരെയാണ് ദിവ്യജ്യോതി പര്യടനം. ആലുവ അദ്വൈതാശ്രമത്തിൽ ഗുരുദേവൻ ജ്വലിപ്പിച്ച കെടാവിളക്കിൽ നിന്ന് ഇന്ന് ഉച്ചയ്ക്ക് രണ്ടരയ്ക്ക് ആശ്രമം സെക്രട്ടറി സ്വാമി ധർമ്മചൈതന്യ ദിവ്യജ്യോതി പകർന്ന് യൂണിയൻ ചെയർമാൻ സി.എൻ. രാധാകൃഷ്ണനും കൺവീനർ ഷൈജു മനയ്ക്കപ്പടിക്കും കൈമാറും. ദിവ്യജ്യോതി യൂത്ത് മൂവ്മെന്റ് യൂണിയൻ ചെയർമാൻ അഖിൽ ബിനു ഏറ്രുവാങ്ങിയ ശേഷം നിരവധി യൂത്ത്മൂവ്മെന്റ് അത്‌ലറ്റുകളുടെയും നൂറുകണക്കിന് ഇരുചക്രവാഹനങ്ങളുടെയും അകമ്പടിയോടെ പറവൂർ മുനിസിപ്പൽ കവലയിൽ എത്തിക്കും. യൂണിയൻ, പോഷകസംഘടന, ശാഖായോഗം എന്നിവയുടെ ഭാരവാഹികളും ഗുരുദേവഭക്തരും ചേർന്ന് സ്വീകരിക്കും. വാദ്യമേളങ്ങളുടെ അകമ്പടിയിൽ നഗരത്തിലൂടെ യൂണിയൻ ആസ്ഥാനത്ത് എത്തിച്ച ശേഷം ഉദ്ഘാടന സമ്മേളനം ആരംഭിക്കും.