കൂത്താട്ടുകുളം: പാറമടയ്ക്ക് അനുമതി നൽകിയെന്ന പേരിൽ തിരുമാറാടി പഞ്ചായത്തിനെതിരെ യു.ഡി.എഫ് നടത്തുന്ന സമരത്തിനെതിരെ എൽ.ഡി.എഫ് പഞ്ചായത്ത് സമിതി മണ്ണത്തൂരിൽ വിശദീകരണ യോഗം നടത്തി.
നിയമപരമായി മണ്ണത്തൂർ ഈറ്റാപ്പിള്ളിയിൽ സ്വകാര്യ വ്യക്തി പാറമട ലൈസൻസ് നേടിയ സംഭവം പഞ്ചായത്ത് ഭരണസമിതിക്കെതിരെ തിരിക്കാനാണ് ശ്രമമെന്ന് നേതാക്കൾ ആരോപിച്ചു. യു.ഡി.എഫ് ഭരണകാലത്ത് പ്രദേശത്ത് നാല് ക്രഷർ യൂണിറ്റുകളും അതിന്റെ ഇരട്ടിയോളം പറമടകളും പ്രവർത്തിച്ചിരുന്നു. ഇപ്പോൾ ഒന്നുപോലും പ്രവർത്തിക്കുന്നില്ല. ഇതെല്ലാം മറച്ചു വച്ചാണ് യുഡിഎഫ് സമരവും മാസങ്ങളായി തുടരുന്ന അപവാദ പ്രചാരണവുമെന്ന് എൽ.ഡി.എഫ് നേതാക്കൾ പറഞ്ഞു. സി.പി.എം ഏരിയ സെക്രട്ടറി പി.ബി. രതീഷ് യോഗം ഉദ്ഘാടനം ചെയ്തു.സിനു എം. ജോർജ് അദ്ധ്യക്ഷനായി. ജിൻസൺ വി. പോൾ, ഒ.എൻ. വിജയൻ, അനിൽ ചെറിയാൻ, വർഗീസ് മാണി, സനൽ ചന്ദ്രൻ, ടി.ജെ. ജോർജ്, ജിനു അഗസ്റ്റിൻ, പഞ്ചായത്ത് പ്രസിഡന്റ് സന്ധ്യ മോൾ പ്രകാശ് എന്നിവർ സംസാരിച്ചു.