മരട്: വയനാട് ദുരിത ബാധിതർക്കായി മുഖ്യമന്ത്രിയുടെ ദുരിതാശ്വാസ നിധിയിലേക്ക് മരട് നഗരസഭ 10 ലക്ഷം രൂപ നൽകും. ഇന്നലെ ചേർന്ന അടിയന്തര കൗൺസിൽ യോഗത്തിൽ തീരുമാനം അംഗീകരിച്ചു. 20 ലക്ഷം രൂപ നൽകണമെന്ന് ആവശ്യപ്പെട്ട് പ്രതിപക്ഷം വിയോജനക്കുറിപ്പ് രേഖപ്പെടുത്തി. നിലവിൽ 10 ലക്ഷം രൂപ നൽകാമെന്നും ഇനിയൊരു ദുരന്തത്തിന് കാത്തുനിൽക്കാതെ നാലു ജില്ലകളെ നേരിട്ട് ബാധിക്കുന്ന മുല്ലപ്പെരിയാർ അണക്കെട്ട് പൊളിച്ച് പണിയുകയാണെങ്കിൽ നഗരസഭയിലെ ഒരു വർഷത്തെ മുഴുവൻ പദ്ധതി വിഹിതവും നൽകാമെന്നും കൗൺസിലിൽ തീരുമാനമായി. ഇപ്പോൾ നൽകുന്ന തുക ദുരിതാശ്വാസ പ്രവർത്തനങ്ങൾക്ക് മാത്രം ഉപയോഗിക്കണമെന്നും ഇനിയൊരു ദുരന്തത്തിന് കാത്തുനിൽക്കാതെ മുല്ലപ്പെരിയാർ വിഷയത്തിലും അടിയന്തരമായ നടപടികൾ സ്വീകരിക്കണമെന്നും ചെയർമാൻ ആവശ്യപ്പെട്ടു.