പറവൂർ: എസ്.എൻ.ഡി.പി യോഗം പറവൂർ യൂണിയന്റെ നേതൃത്വത്തിൽ 28 ദിവസം നീണ്ടുനിന്ന ശ്രീനാരായണ ജയന്തി ആഘോഷങ്ങൾക്ക് സമാപനം കുറിച്ചുള്ള ഘോഷയാത്രയും സമാപന സമ്മേളനവും നാളെ നടക്കും. ഘോഷയാത്രയിൽ 72 ശാഖായോഗങ്ങളിൽ നിന്നുള്ള 20,000 ശ്രീനാരായണീയർ പങ്കെടുക്കും. വൈകിട്ട് മൂന്നിന് യൂണിയൻ ഓഫീസ് അങ്കണത്തിലെ ഗുരുദേവ മണ്ഡപത്തിലെ പൂജകൾക്ക് ശേഷം ഘോഷയാത്ര ആരംഭിക്കും. മുനിസിപ്പൽ കവല, കെ.എം.കെ. പുല്ലംകുളം, ചേന്ദമംഗലം കവല വഴി പറവൂർ പഴയ യൂണിയൻ ഓഫീസ് ഓഡിറ്റോറിയത്തിൽ എത്തുന്നതോടെ സമാപന സമ്മേളനം ആരംഭിക്കും. സമ്മേളനം മന്ത്രി പി. രാജീവ് ഉദ്ഘാടനം ചെയ്യും. യൂണിയൻ ചെയർമാൻ സി.എൻ. രാധാകൃഷ്ണൻ അദ്ധ്യക്ഷനാകും. പ്രതിപക്ഷനേതാവ് വി.ഡി. സതീശൻ ജയന്തിദിന സന്ദേശം നൽകും. വിശിഷ്ടവ്യക്തികളെ ആദരിക്കൽ നഗരസഭ ചെയർപേഴ്സൺ ബീന ശശിധരനും വിദ്യാഭ്യാസ അവാർഡ്ദാനം നഗരസഭ പ്രതിപക്ഷനേതാവ് ടി.വി. നിഥിനും യൂണിയൻതല കലാമത്സരങ്ങളുടെ സമ്മാനദാനം നഗരസഭ കൗൺസിലർ രഞ്ജിത്ത് മോഹനും നിർവഹിക്കും. യൂണിയൻ സെക്രട്ടറി ഷൈജു മനയ്ക്കപ്പടി, യോഗം കൗൺസിലർ ഇ.എസ്. ഷീബ, യോഗം ഡയറക്ടർമാരായ പി.എസ്. ജയരാജ്, എം.പി. ബിനു, ഡി. ബാബു, യൂണിയൻ കമ്മിറ്റിഅംഗങ്ങളായ ‌ഡി. പ്രസന്നകുമാർ, കണ്ണൻ കൂട്ടുകാട്, കെ.ബി. സുഭാഷ്, ജയന്തി ആഘോഷകമ്മിറ്റി ചെയർമാൻ എം.കെ. ആഷിക്, കോ ഓഡിനേറ്റർ ടി.പി. രാജേഷ്, പെൻഷനേഴ്സ് ഫോറം ചെയർമാൻ പി.ടി. ശിവസുധൻ, വനിതാസംഘം സെക്രട്ടറി ബിന്ദു ബോസ്, യൂത്ത്മൂവ്മെന്റ് സെക്രട്ടറി അനീഷ് തുരുത്തിപ്പുറം എന്നിവർ സംസാരിക്കും.

----------------------------

എച്ച്.എം.ഡി.പി സഭ

വടക്കേക്കര ഹിന്ദുമത ധർമ്മപരിപാലന സഭയുടെ നേതൃത്വത്തിൽ ജയന്തി ആഘോഷം ഗുരുദേവൻ പ്രതിഷ്ഠാകർമ്മം നിർവഹിച്ച മൂത്തകുന്നം ശ്രീനാരായണമംഗലം ക്ഷേത്രത്തിൽ രാവിലെ 5.15ന് വിശേഷാൽപൂജയോടെ തുടങ്ങും. 6.30ന് ഗുരുദേവ മണ്ഡപത്തിൽ വിശേഷാഷപൂജ, 8ന് സഭ പ്രസിഡന്റ് കെ.വി. അനന്തൻ പീതപതാക ഉയർത്തും. ഒമ്പതിന് ജയന്തിദിന ഘോഷയാത്ര, പത്തിന് ജയന്തിദിന സമ്മേളനം ഗുരുവായൂർ ദേവസ്വം ബോ‌‌‌ർഡ് അംഗം കെ.പി. വിശ്വനാഥൻ ഉദ്ഘാടനം ചെയ്യും. സഭ പ്രസിഡന്റ് കെ.വി. അനന്തൻ അദ്ധ്യക്ഷനാകും. എസ്.എൻ.ഡി.പി യോഗം കൗൺസിലർ ഇ.എസ്. ഷീബ, സഭ സെക്രട്ടറി ഡി. സുനിൽകുമാർ, എസ്.എൻ.എം കോളേജ് പ്രിൻസിപ്പൽ ഡോ. ടി.എച്ച്. ജിത, ആഘോഷ കമ്മിറ്റി കൺവീനർ സി.ജി. ജയറാം എന്നിവർ സംസാരിക്കും.

-------------------------

ഗുരുദേവ സംഘമിത്ര

പാലാതുരുത്ത് - മുണ്ടുരുത്ത് ഗുരുദേവ സംഘമിത്രയിൽ ശ്രീനാരായണ ജയന്തിദിനം വിവിധ പരിപാടികളോടെ ആഘോഷിക്കും. പുലർച്ചെ ഗുരുമണ്ഡപത്തിൽ വിശേഷാൽപൂജ, രാവിലെ ആറിന് ശിവഗിരിമഠത്തിലെ പ്രണവസ്വരൂപാന്ദസ്വാമിയുടെ കാർമ്മികത്വത്തിൽ തിരുഅവതാര ആരതിപൂജ, എട്ടിന് സമൂഹപ്രാർത്ഥ, ഗുരുപുഷ്പാഞ്ജലി, ഒമ്പതരക്ക് ചതയദിന സമ്മേളനം എസ്.എൻ.ഡി.പി യോഗം പറവൂർ യൂണിയൻ ചെയർമാൻ സി.എൻ. രാധാകൃഷ്ണൻ ഉദ്ഘാടനം ചെയ്യും. സംഘമിത്ര ചെയർമാൻ എം.പി. അനിൽകുമാർ അദ്ധ്യക്ഷനാകും. ഡോ. എം.എം. ബഷീർ മുഖ്യപ്രഭാഷണം നടത്തും. വിദ്യാഭ്യാസ പുരസ്കാരദാനം ജില്ലാപഞ്ചായത്ത് അംഗം ഷാരോൺ പനക്കൽ നിർവഹിക്കും. സംഘമിത്ര സെക്രട്ടറി എം.എം. പവിത്രൻ, ട്രഷറർ എം.ആർ. സുനിൽ എന്നിവർ സംസാരിക്കും.

------------------------------------

പറവൂർ ഈഴവ സമാജം

പറവൂർ ഈഴവ സമാജത്തിന്റെ നേതൃത്വത്തിൽ പറവൂത്തറ ശ്രീകുമാരമംഗലം ക്ഷേത്രത്തിൽ രാവിലെ പത്തിന് ഗുരുപൂജ, പത്തരക്ക് പ്രസാദഊട്ട്. പറവൂർ പുല്ലംകുളം ശ്രീനാരായണ ഹയർസെക്കൻഡറി സ്കൂളിലെ ഗുരുദേവ മണ്ഡപത്തിൽ രാവിലെ എട്ടിന് സമൂഹ പ്രാർത്ഥന, പുഷ്പാർച്ചന എന്നിവ നടക്കും. സമാജം പ്രസിഡന്റ് ജ്യോതി ശങ്കരമാലിൽ, സെക്രട്ടറി പി.എസ്. ഹരിദാസ് എന്നിവർ നേതൃത്വം നൽകും.