കൊച്ചി: ക്ലാസിക് ലെജന്റ്‌സിന്റെ ഏറ്റവും വലിയ മോട്ടോർസൈക്കിൾ ബ്രാൻഡായ ബി.എസ്.എ (ബെർമിങ്ങ്‌ഹാം സ്‌മാൾ ആംസ് കമ്പനി) ബി.എസ്.എ ഗോൾഡ് സ്റ്റാർ 650 മോട്ടോർ സൈക്കിൾ ഇന്ത്യയിൽ അവതരിപ്പിച്ചു. ലോകത്തിലെ ഏറ്റവും വലിയ മോട്ടോർസൈക്കിൾ നിർമാതാക്കളായിരുന്ന ബി.എസ്.എ ഗോൾഡ് സ്റ്റാർ 650 ബൈക്കുമായാണ് ഇന്ത്യൻ വിപണിയിലെത്തുന്നത്.

2.99 ലക്ഷം രൂപയാണ് ഗോൾഡ് സ്റ്റാർ 650ന്റെ ഡൽഹിയിലെ എക്‌സ് ഷോറൂം വില. 652 സി.സി ലിക്വിഡ് കൂൾഡ് സിംഗിൾ എഞ്ചിനും 55 എൻ.എം ടോർക്കുമാണ് വാഹനത്തിലുള്ളത്. ബ്രെംബോ ബ്രേക്കുകൾ, എ.ബി.എസ്, അലുമിനിയം എക്‌സൽ റിമ്മുകൾ, പിറേലി ടയറുകൾ തുടങ്ങി നിരവധി സവിശേഷതകളാണ് വാഹനത്തിലുള്ളത്. ആറ് നിറങ്ങളിൽ വാഹനം ലഭ്യമാണ്.

ആഗോള മോട്ടോർസൈക്കിൾ അനുഭവം ഇന്ത്യയിലേക്കെത്തിക്കുകയാണ് ബി.എസ്.എയെ ഇന്ത്യയിലേക്ക് എത്തിക്കുന്നതു വഴി സാധ്യമായതെന്ന് മഹീന്ദ്ര ഗ്രൂപ് ചെയർമാൻ ആനന്ദ് മഹീന്ദ്ര പറഞ്ഞു.

ബിഎസ്എയുടെ സുവർണ കാലത്തെ അനുസ്മരിപ്പിക്കുന്നതിനായി ഈ വാഹനത്തിന്റെ എഞ്ചിൻ ടാങ്കിന്റെ ഡിസൈൻ മുതൽ എഞ്ചിന്റെ ഓരോ കണിക വരെയും അതിയായ ശ്രദ്ധയോടെയാണ് രൂപകൽപ്പന ചെയ്തിരിക്കുന്നതെന്ന് ക്ലാസിക ലെജന്റ്‌സ് സഹ സ്ഥാപകൻ അനുപം തേജ പറഞ്ഞു.