കൊച്ചി: എറണാകുളം തേവയ്ക്കലിൽ 19കാരിയെ കുളത്തിൽ മരിച്ചനിലയിൽ കണ്ടെത്തി. കങ്ങരപ്പടി കണിയാത്ത് വീട്ടിൽ സുരേന്ദ്രന്റെ മകൾ അമൃതയുടെ മൃതദേഹമാണ് ഇന്നലെ രാവി​ലെ കണ്ടെത്തി​യത്. എടത്തല എം.ഇ.എസ് കോളേജിലെ ബി.ബി.എ വിദ്യാർത്ഥിനിയാണ്.

ഞായറാഴ്ച അർദ്ധരാത്രിവരെ മുറിയിലിരുന്ന് പഠിച്ചിരുന്ന പെൺകുട്ടിയെ പിന്നീട് കാണാതാകുകയായിരുന്നു. തുടർന്ന് നടത്തിയ തെരച്ചി​ലി​ൽ വീടിന് താഴ്ഭാഗത്തുള്ള മുനിസിപ്പാലിറ്റിയുടെ കുളത്തിന് സമീപം ചെരുപ്പ് കണ്ടെത്തി. തുടർന്ന് പൊലീസിനെയും ഫയർഫോഴ്‌സിനേയും അറിയിച്ചു. ഫയർഫോഴ്‌സ് എത്തിയാണ് മൃതദേഹം പുറത്തെടുത്തത്.

കളമശേരി മെഡിക്കൽ കോളേജിൽ പോസ്റ്റ്‌മോർട്ടത്തിനുശേഷം ബന്ധുക്കൾക്ക് കൈമാറി​. സംസ്‌കാരം നടത്തി. മാതാവ്: ശ്യാമള, സഹോദരൻ: അതുൽ സുരേന്ദ്രൻ. പൊലീസ് അന്വേഷണം തുടങ്ങി​. ആത്മഹത്യയാണെന്നാണ് പ്രാഥമികനിഗമനം.