മട്ടാഞ്ചേരി: അടുക്കളയിൽ ഭക്ഷണം തയ്യാറാക്കുന്നതിനിടെ വെറുതെ ഇഷ്ടപ്പെട്ട ഗസൽ ഒന്ന് മൂളിയതാണ് ഫോർട്ട്കൊച്ചി തുരുത്തി സ്വദേശിനിയും ഇപ്പോൾ കൽവത്തിയിൽ താമസിക്കുകയും ചെയ്യുന്ന സലീഖത്ത് അഷറഫ്. ഗസൽ ഗായകൻ മെഹദി ഹസന്റെ ഹിറ്റായ അപ്നോം നേ ഗം ദിയ എന്ന ഗാനം സഹോദരൻ അഹദാണ് വീഡിയോയിൽ പകർത്തി സോഷ്യൽ മീഡിയയിൽ ഇട്ടത്. ഇന്ന് സോഷ്യൽ മീഡിയയിൽ വൈറലാണ് ഈ 51 കാരി വീട്ടമ്മയും അവരുടെ ഗസൽ ആലാപനവും.

സലീഖത്ത് അഷറഫിന്റെ ശബ്ദ മാധുര്യമാണ് സംഗീത പ്രേമികളെ ആകർഷിച്ചത്. മെഹദി ഹസന്റെ ഗസലിന് പുറമേ തലത്ത് അസീസ്,സൈഗാൾ എന്നിവരുടെ ഗസലുകളും സലീഖത്തിന് ഏറെ ഇഷ്ടമാണ്. ഒഴിവ് സമയങ്ങളിൽ കേട്ടുകേട്ട് പഠിച്ചതാണ് ഗസൽ. ശാസ്ത്രീയമായി സംഗീതം അഭ്യസിച്ചിട്ടില്ല. എന്നാൽ,​ സലീഖത്തിന്റെ ഉമ്മ നാട്ടുകാർ ഏറെ സ്നേഹത്തോടെ കൗലത്താ എന്ന് വിളിക്കുന്ന പി.ബി കൗലത്ത് കൊച്ചിയുടെ തനത് കലാരൂപമായ കൈ കൊട്ടി പാട്ട് കലാകാരിയും വിപ്ളവ ഗായികയുമായിരുന്നു. ഉമ്മയുടെ സംഗീത പാരമ്പര്യമാണ് തനിക്ക് ലഭിച്ചതെന്ന് സലീഖത്ത് പറയുന്നത്. സലീഖത്തിന്റെ ഗസൽ താൽപര്യത്തിന് ഭർത്താവ് അഷറഫിന്റെയും മക്കളായ മുഹമ്മദ് അസ്ഹറുദ്ദീന്റെയും അമീർ സുഹൈലിന്റെയും പൂർണ പിന്തുണയുണ്ട്. ക്രിക്കറ്റ് പ്രേമിയായ സലീഖത്ത് തന്നെയാണ് രണ്ട് മക്കൾക്കും ക്രിക്കറ്റ് താരങ്ങളുടെ പേര് നൽകിയത്. സജീവ ഇടത് പ്രവർത്തകയും എഡിഎസ് സെക്രട്ടറിയും കൂടിയാണ് സലീഖത്ത്.