തൃപ്പൂണിത്തുറ: ഉദയംപേരൂർ ഗ്രാമപഞ്ചായത്തിലെ ഡ്രൈവർമാരുടെ നിയമനവുമായി ബന്ധപ്പെട്ട റാങ്ക്ലിസ്റ്റ് പ്രസിദ്ധീകരിക്കുന്നതിന് എതിർപ്പുമായി ഘടകകക്ഷിയായ സി.പി.ഐ രംഗത്തുവന്നത് എൽ.ഡി.എഫിൽ പൊട്ടിത്തെറി സൃഷ്ടിച്ചിരുന്നു. ഇത് വിവാദമായതിന് പിന്നാലെ ഈ വിഷയത്തിൽ കോൺഗ്രസ് അംഗങ്ങളുടെ ഭിന്നതയും പുറത്തുവന്നു. ശനിയാഴ്ച നടന്ന പഞ്ചായത്ത് കമ്മറ്റിയുടെ മിനിട്സ് കഴിഞ്ഞദിവസം പുറത്ത് വന്നപ്പോഴാണ് കോൺഗ്രസിനുള്ളിലെ ചേരിതിരിവ് മറനീക്കി പുറത്തുവന്നത്.

കമ്മി​റ്റിയിലെ ഏഴാമത്തെ അജണ്ടയായ ഡ്രൈവറുടെ റാങ്ക്ലിസ്റ്റ് പ്രസിദ്ധീകരിച്ച് നിയമനം നടത്തണമെന്ന തീരുമാനത്തിനെതിരായി കോൺഗ്രസ് അംഗങ്ങളായ സോമിനി സണ്ണി, ആനി അഗസ്റ്റിൻ, നിഷ ബാബു, സ്മിത രാജേഷ് എന്നിവർ വിയോജിപ്പ് പ്രകടിപ്പിച്ചില്ലെന്നത് പുറത്തുവന്ന മിനി​റ്റ്സിൽ നി​ന്ന് വ്യക്തമായി. ഇവർ പഴയ ഡ്രൈവർമാരെ പിന്തുണച്ചെങ്കിലും റാങ്ക് ലിസ്റ്റ് പ്രസിദ്ധീകരിക്കുന്നതിനെ എതിർത്തിട്ടില്ലെന്ന് സി.പി.എം പറഞ്ഞു.

20 അംഗ പഞ്ചായത്തിലെ 9 സി.പി.എം അംഗങ്ങളും 4 കോൺഗ്രസ് അംഗങ്ങളും ഉൾപ്പെടെ 13 പേർ റാങ്ക് ലിസ്റ്റിനെ അനുകൂലിച്ചും 3 കോൺഗ്രസ് അംഗങ്ങൾ, 3 സി.പി.ഐ അംഗങ്ങൾ 1 സ്വതന്ത്രൻ ഉൾപ്പെടെ 7 പേർ എതിർത്തും വോട്ടുചെയ്തു. ഇതോടെ ഈ വിഷയത്തിൽ കോൺഗ്രസ് അംഗങ്ങൾക്കിടയിലെ ചേരിതിരിവും ചർച്ചയായി.

അതേസമയം കോൺഗ്രസിനൊപ്പം ചേർന്ന് കോടതി വിധിയെ അട്ടിമറിക്കാനും മുന്നണിയെ തകർക്കാനും ശ്രമിച്ച നിലപാടിനെതിരെ സി.പി.എം അംഗങ്ങൾ സി.പി.ഐ നേതൃത്വത്തിന് പരാതി നൽകിയിട്ടുണ്ട്. കോടതി വിധിക്കെതിരെ പഞ്ചായത്ത് കമ്മി​റ്റിയിൽ നിലപാടെടുത്ത 7 പേർക്കെതി​രെ കോടതിയിൽ പരാതി നൽകുമെന്നും പറയുന്നുണ്ട്.