മട്ടാഞ്ചേരി: സ്വകാര്യ ബസിൽ വിദ്യാർത്ഥികൾക്ക് യാത്രാനിരക്കിലെ ഇളവ് നിഷേധിച്ചത് ചോദ്യം ചെയ്ത എസ്.എഫ്.ഐ.പ്രവർത്തകരെ സ്വകാര്യ ബസ് ജീവനക്കാർ മർദ്ദിച്ചതായി പരാതി. കൊച്ചിൻ കോളേജ് വിദ്യാർത്ഥികളായ എസ്.എഫ്.ഐ ഏരിയാ സെക്രട്ടറി പി.എച്ച് മുസമ്മിൽ, എസ്.എഫ്.ഐ മട്ടാഞ്ചേരി ലോക്കൽ സെക്രട്ടറി യാസിർ ഹമീദ് എന്നിവർക്കാണ് മർദ്ദനമേറ്റത്. ഇന്നലെ വൈകിട്ട് മൂന്ന് മണിയോടെ കൂവപ്പാടം ബസ് സ്റ്റോപ്പിൽ വെച്ചാണ് സംഭവം. രാവിലെ എസ്.എഫ്.ഐ ഏരിയ പ്രസിഡന്റ് കെ.എച്ച് ഷഹബാസിനെ ഫോർട്ട്കൊച്ചി ചിറ്റൂർ റൂട്ടിൽ സർവീസ് നടത്തുന്ന ഹെയ്ൽ മേരി എന്ന ബസിൽ നിന്ന് യാത്രാനിരക്കിൽ ഇളവ് ആവശ്യപ്പെട്ടപ്പോൾ ഇറക്കി വിട്ടിരുന്നു. തുടർന്നാണ് എസ്.എഫ്.ഐയുടെ നേതൃത്വത്തിൽ വൈകിട്ട് ബസ് ജീവനക്കാരുടെ നടപടിയെ ചോദ്യം ചെയ്തത്. ഇതിൽ രോഷാകുലരായ ബസ് ജീവനക്കാർ വിദ്യാർത്ഥികളെ മർദ്ദിക്കുകയായിരുന്നുവെന്നാണ് പരാതി. ഇരുവരും കരുവേലിപ്പടി സർക്കാർ ആശുപത്രിയിൽ ചികിത്സയിലാണ്. സംഭവത്തിൽ മട്ടാഞ്ചേരി പൊലീസ് കേസെടുത്തു.