കൊച്ചി: ഹേമ കമ്മിറ്റി റിപ്പോർട്ട് പുറത്തുവന്നതിന് പിന്നാലെ ചില നടന്മാർക്കെതിരെ ഉയർന്ന ലൈംഗിക പീഡന ആരോപണങ്ങളിലും അംഗങ്ങൾ തമ്മിലുള്ള അഭിപ്രായ ഭിന്നതയിലും ആടിയുലഞ്ഞ് താരസംഘടനയായ 'അമ്മ'. പൊലീസിൽ പരാതികൾ എത്തിത്തുടങ്ങിയതോടെ കൂടുതൽ പ്രതിസന്ധിയിലേക്കാണ് കാര്യങ്ങൾ നീങ്ങുന്നത്.

ആരോപണങ്ങൾ പെരുമഴപോലെ വരുന്ന സാഹചര്യത്തിൽ സ്വീകരിക്കേണ്ട നിലപാടിൽ വ്യക്തത വരുത്താനും സംഘടനയ്ക്ക് കഴിയുന്നില്ല. കാര്യങ്ങൾ ചർച്ച ചെയ്യാൻ എക്സിക്യൂട്ടീവ് യോഗം ചേരുമ്പോൾ പൊട്ടിത്തെറിക്കും സാദ്ധ്യതയുണ്ട്. ഇന്നു ചേരാനിരുന്ന എക്സിക്യൂട്ടീവ് യോഗം പ്രസിഡന്റ് മോഹൻലാലിന്റെ അസൗകര്യത്തെ തുടർന്ന് മറ്റൊരു ദിവസത്തേക്ക് മാറ്റിവച്ചിരിക്കുകയാണ്.

ഒരു നടിയുടെ ആരോപണത്തെ തുടർന്ന് ജനറൽ സെക്രട്ടറി സ്ഥാനത്തുനിന്ന് സിദ്ദിഖിന് രാജിവയ്ക്കേണ്ടി വന്നതിന്റെ ആഘാതം ചെറുതൊന്നുമല്ല സംഘടനയ്ക്കുണ്ടാക്കിയത്. പകരം ചുമതല ജോയിന്റ് സെക്രട്ടറി ബാബുരാജിന് നൽകാൻ നീക്കം നടന്നെങ്കിലും അദ്ദേഹത്തിനെതിരെയും ആരോപണം ഉയർന്നത് കൂടുതൽ പ്രതിസന്ധിയിലാക്കി.

ജനറൽ സെക്രട്ടറി സ്ഥാനത്തേക്ക് ജഗദീഷിന്റെ പേരടക്കം ഉയർന്നുവരുന്നുണ്ടെങ്കിലും നടിമാർ ആരെങ്കിലും മതിയെന്ന അഭിപ്രായം ഉയരുന്നുണ്ട്. ഇക്കാര്യങ്ങളടക്കം തീരുമാനിക്കാൻ എക്സിക്യൂട്ടീവ് യോഗം ചേരേണ്ടതുണ്ട്. അതിൽ ഇതേച്ചൊല്ലി വ്യത്യസ്ത അഭിപ്രായങ്ങൾ ഉയർന്നേക്കാം.

പരസ്പരം വിഴുപ്പലക്കൽ

അംഗങ്ങളുടെയും എക്സി​ക്യുട്ടീവ് കമ്മി​റ്റി​യംഗങ്ങളുടെയും വാട്സാപ്പ് ഗ്രൂപ്പുകളി​ൽ ആരോപണ, പ്രത്യാരോപണങ്ങളും തർക്കങ്ങളും കൊഴുക്കുന്നു

ഹേമ കമ്മിറ്റി റിപ്പോർട്ട് പുറത്തുവന്ന സമയത്ത് നേതൃത്വം മൗനം പാലിച്ചപ്പോഴും എതിർപ്പുകളുയർന്നിരുന്നു

തുടർന്നാണ് സി​ദ്ദി​ഖ് ഞായറാഴ്ച വാർത്താസമ്മേളനത്തി​ന് തയ്യാറായത്. പവർഗ്രൂപ്പ് ഇല്ലെന്നും എല്ലാം ശുഭമാണെന്നുമുള്ള വി​ശദീകരണങ്ങൾക്കെതി​രെ മി​നി​റ്റുകൾക്കുള്ളി​ൽ ജഗദീഷ് ​ രംഗത്തു വന്നു

വൈസ് പ്രസി​ഡന്റ് ജയൻ ചേർത്തലയും ഉർവശി​യും വി​രുദ്ധ അഭി​പ്രായങ്ങൾ പറഞ്ഞു

താൻ ജനറൽ സെക്രട്ടറി​യാകുന്നത് തടയാനുള്ള ഗൂഢലക്ഷ്യത്തോടെയാണ് ജൂനി​യർ ആർട്ടി​സ്റ്റിന്റെ ആരോപണമെന്ന ബാബുരാജി​ന്റെ പ്രസ്താവനയി​ൽ നേതൃത്വത്തി​ലെ പടലപ്പി​ണക്കങ്ങളുടെ സൂചനയുണ്ട്

തലമുറമാറ്റം വരുമോ?

അമ്മയ്ക്ക് തെറ്റുപറ്റി​യെന്നും തി​രുത്തൽ വേണമെന്നുമുള്ള പൃഥ്വി​രാജി​ന്റെ പ്രസ്താവനയും ടൊവി​നോ തോമസി​ന്റെ സ്വതന്ത്രമായ അഭി​പ്രായ പ്രകടനവും നേതൃത്വത്തി​ൽ തലമുറ മാറ്റത്തി​നുള്ള സാദ്ധ്യതകളി​ലേക്ക് വിരൽ ചൂണ്ടുന്നുണ്ട്. യുവനടന്മാരെ നേതൃത്വത്തിലേക്ക് കൊണ്ടുവരണമെന്ന ആവശ്യം സമൂഹമാദ്ധ്യമങ്ങളിലടക്കം പ്രചരിക്കുന്നുണ്ട്.

 '​അ​മ്മ​'​ ​എ​ക്സി​ക്യു​ട്ടീ​വ് യോ​ഗം​ ​മാ​റ്റി

അ​മ്മ​യു​ടെ​ ​ഇ​ന്നു​ ​നി​ശ്ച​യി​ച്ചി​രു​ന്ന​ ​അ​ടി​യ​ന്ത​ര​ ​എ​ക്‌​സി​ക്യു​ട്ടീ​വ് ​ക​മ്മി​റ്റി​ ​യോ​ഗം​ ​മാ​റ്റി.​ ​നാ​ളെ​ ​യോ​ഗം​ ​ചേ​രാ​ൻ​ ​സാ​ദ്ധ്യ​ത​യു​ണ്ട്.​ ​പ്ര​സി​ഡ​ന്റ് ​മോ​ഹ​ൻ​ലാ​ൽ​ ​ചെ​ന്നൈ​യി​ൽ​ ​നി​ന്ന് ​എ​ത്താ​ൻ​ ​വൈ​കു​ന്ന​താ​ണ് ​കാ​ര​ണ​മാ​യി​ ​പ​റ​യു​ന്ന​തെ​ങ്കി​ലും​ ​നേ​താ​ക്ക​ൾ​ക്കെ​തി​രെ​ ​ഉ​യ​രു​ന്ന​ ​ലൈം​ഗി​ക​പീ​ഡ​ന​ ​ആ​രോ​പ​ണ​ങ്ങ​ളാ​ണ് ​ത​ട​സ​മെ​ന്നു​ ​ക​രു​തു​ന്നു.
വൈ​സ് ​പ്ര​സി​ഡ​ന്റ് ​ജ​ഗ​ദീ​ഷ് ​ഉ​ൾ​പ്പെ​ടെ​ ​ഹേ​മ​ ​ക​മ്മി​റ്റി​ ​റി​പ്പോ​ർ​ട്ടി​ൽ​ ​സം​ഘ​ട​ന​യു​ടെ​ ​നി​ല​പാ​ടി​നു​ ​വി​രു​ദ്ധ​മാ​യ​ ​അ​ഭി​പ്രാ​യം​ ​പ​റ​ഞ്ഞ​ ​സാ​ഹ​ച​ര്യ​ത്തി​ൽ​ ​യോ​ഗം​ ​ക​ലു​ഷ​മാ​യേ​ക്കും.​ ​പു​തി​യ​ ​ലൈം​ഗി​ക​ ​ആ​രോ​പ​ണ​ങ്ങ​ൾ​ ​ദി​വ​സ​വും​ ​ഉ​യ​രു​ന്ന​ ​സാ​ഹ​ച​ര്യ​വും​ ​പ്ര​തി​സ​ന്ധി​യാ​ണ്.