കിഴക്കമ്പലം: മലയിടംതുരുത്ത് നടക്കാവ് പര്യത്ത് കോളനി കുടിയൊഴിപ്പിക്കാനുള്ള നീക്കം പെരുമ്പാവൂർ മുൻസിഫ് കോടതി ഒക്ടോബർ ഒന്നു വരെ സ്​റ്റേ ചെയ്തു. നേരത്തെ മുൻസിഫ് കോടതി നൽകിയ സ്​റ്റേ ഇന്നലെ അവസാനിച്ചതോടെയാണ് കുടിയൊഴിപ്പിക്കാനുള്ള നീക്കം ശക്തമാക്കിയത്. ഒരു വർഷം മുൻപ് സുപ്രീംകോടതി ഉത്തരവിനെ തുടർന്ന് അഡ്വക്കേ​റ്റ് കമ്മിഷന്റെ നേതൃത്വത്തിൽ താലൂക്ക് സർവേയർ ഉൾപ്പെടെ എത്തി കോളനി പൊളിക്കാൻ ശ്രമിച്ചെങ്കിലും ശക്തമായ പ്രതിഷേധത്തെ തുടർന്ന് പുനരധിവാസത്തിന് 4 ദിവസം സമയം കൊടുക്കുകയായിരുന്നു. തുടർന്ന് കോളനി നിവാസികൾ മുൻസിഫ് കോടതിയെ സമീപിച്ച് താത്കാലികമായി സ്​റ്റേ വാങ്ങുകയായിരുന്നു. ഇന്നലെ രാവിലെ എ.എസ്.പി മോഹിത് റാവത്തിന്റെ നേതൃത്വത്തിൽ വൻ പൊലീസ് സന്നാഹം കോളനിയുടെ സമീപത്ത് നില ഉറപ്പിച്ചിരുന്നു. കൂടാതെ അഗ്‌നി രക്ഷാസേന, ജല അതോറി​റ്റി, വൈദ്യുതി ബോർഡ്, ആരോഗ്യ വകുപ്പ് എന്നിവരെല്ലാം എത്തിയതോടെ കോളനി നിവാസികൾ പ്രതിഷേധവുമായി രംഗത്ത് വന്നു. ഇതോടെ പ്രദേശത്ത് സംഘർഷാവസ്ഥ നിലനിന്നിരുന്നു. എന്നാൽ ഉച്ചയ്ക്ക് 12ന് കേസ് ഒക്ടോബർ ഒന്നിലേക്ക് മാ​റ്റിയ വിവരം അറിഞ്ഞതോടെ പ്രതിഷേധം അവസാനിപ്പിക്കുകയായിരുന്നു. 8 കുടുംബങ്ങളാണ് ഇവിടെ താമസിക്കുന്നത്‌