കൊച്ചി: വിവാഹവാഗ്ദാനം നൽകി പീഡിപ്പിക്കുകയും ദൃശ്യങ്ങൾ യുവതിയുടെ കുടുംബത്തിന് കൈമാറുമെന്ന് ഭീഷണിപ്പെടുത്തുകയും ചെയ്ത കേസിൽ യുവ സംഗീത സംവിധായകൻ അറസ്റ്റിൽ. എറണാകുളത്ത് താമസിക്കുന്ന ഏറ്റുമാനൂർ സ്വദേശി ശരത് മോഹനാണ് (40) അറസ്റ്റിലായത്. തിരുവനന്തപുരം സ്വദേശിനിയുടെ പരാതിയിൽ വൈക്കത്തുള്ള പെൺസുഹൃത്തിന്റെ വീട്ടിൽ നിന്നാണ് ഇയാളെ പാലാരിവട്ടം പൊലീസ് പിടികൂടിയത്.

2023 ഒക്ടോബറിലായിരുന്നു യുവതിയെ ഇയാൾ ആദ്യമായി പീഡനത്തിന് ഇരയാക്കിയത്. തുടർന്ന് ജില്ലയിലെ വിവിധയടങ്ങളിലെത്തിച്ചും പീഡിപ്പിച്ചു. ഉപദ്രവം സഹിക്കവയ്യതായതോടെ യുവതി നാട്ടിലേക്ക് പോകാൻ തയ്യാറെടുത്തതോടെയാണ് പീഡനദൃശ്യങ്ങൾ കുടുംബത്തിന് കൈമാറുമെന്ന് ഭീഷണിപ്പെടുത്തിയത്. ശരത്ത് മർദ്ദിക്കുകയും കഴുത്തുഞെരിച്ചെന്നും യുവതി പരാതിയിൽ പറയുന്നു.