തൊടുപുഴ: മണ്ണിടിച്ചിലിന് സാധ്യതയുള്ള പ്രദേശങ്ങളിൽ സർക്കാർ മുന്നൊരുക്കങ്ങൾ നടത്തണമെന്ന് കേരള കോൺഗ്രസ് വർക്കിംഗ് ചെയർമാൻ പി.സി.തോമസ് ആവശ്യപ്പെട്ടു. വയനാട് ദുരന്തത്തിന്റെ പശ്ചാത്തലത്തിലെങ്കിലും കേരളത്തിൽ ഉരുൾ പൊട്ടലിനും മണ്ണിടിച്ചിലിനും സാദ്ധ്യതയുള്ള പ്രദേശങ്ങളിൽ സർക്കാർ മുന്നൊരുക്കങ്ങൾ നടത്തണം. മണ്ണിടിച്ചിലിന് സാധ്യതയുണ്ട് എന്ന് ഡിസാസ്റ്റർ മാനേജ്‌മെന്റ് അതോറിറ്റിയുടെ പഠന റിപ്പോർട്ട് ഉണ്ടായിരുന്ന കുടയത്തൂർ പഞ്ചായത്തിൽ ഉരുൾപൊട്ടലിൽ ഒരു കുടുംബം ഇല്ലാതായിട്ട് രണ്ട് വർഷമാകുന്നു. നാളിതുവരെ സംസ്ഥാന സർക്കാരിന്റെ ഭാഗത്തുനിന്നും ഒരു ഇടപെടലും ഉണ്ടായിട്ടില്ല. ജില്ലയിലെ പല പ്രദേശങ്ങളിലും സമാന സാഹചര്യങ്ങളാണുള്ളത്. മറ്റ് പല ജില്ലകളിലും ഇതേ പ്രശ്നമുണ്ടെന്ന് അദ്ദേഹം പറഞ്ഞു.