തൊടുപുഴ: എസ്.എൻ.ഡി.പി യോഗം തൊടുപുഴ യൂണിയന്റെ വെങ്ങല്ലൂർ ചെറായിക്കൽ ശ്രീസുബ്രഹ്മണ്യസ്വാമി ഗുരുദേവ ക്ഷേത്രത്തിൽ പുതുതായി നിർമ്മിച്ചിട്ടുള്ള ചുറ്റമ്പലത്തിന്റെയും ഗുരുദേവക്ഷേത്ര പ്രാർത്ഥനമണ്ഡപത്തിന്റെയും സമർപ്പണവും സെപ്തംബർ ഒന്നിന് നടത്താനിരുന്നത് പ്രതികൂല കാലാവസ്ഥയെത്തുടർന്ന് സെപ്തംബർ 8 ന് ലേയ്ക്ക് മാറ്റിവെച്ചതായി യൂണിയൻ ഭാരവാഹികൾ അറിയിച്ചു. ക്ഷേത്രചടങ്ങുകളായ അഷ്ടബന്ധ നവീകരണ കലശവും അർദ്ധസഹസ്രകലശവും ഇന്നലെ ആരംഭിച്ചു. ചടങ്ങുകൾ സെപ്തംബർ 6ന് ഉച്ചയ്ക്ക് നടക്കുന്ന മഹാപ്രസാദ ഊട്ടോടുകൂടി സമാപിക്കും. ഗുരുദേവക്ഷേത്ര പ്രാർത്ഥനമണ്ഡപത്തിന്റെയും സമർപ്പണവും സെപ്തംബർ 8 ന് രാവിലെ 9.30ന് എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ നിർവ്വഹിക്കും. യൂണിയൻ ചെയർമാൻ ബിജു മാധവൻ അദ്ധ്യക്ഷനാകും. എസ്.എൻ ട്രസ്റ്റ് ഡയറക്ടർ ബോർഡംഗം പ്രീതി നടേശൻ, യോഗം വൈസ് പ്രസിഡന്റ് തുഷാർ വെള്ളാപ്പള്ളി, യോഗം കൗൺസിലർ പച്ചയിൽ സന്ദീപ്, വനിതാ സംഘം കേന്ദ്ര സമിതി പ്രസിഡന്റ് കെ.പി. കൃഷ്ണകുമാരി, സെക്രട്ടറി അഡ്വ. സംഗീത വിശ്വനാഥൻ, യൂണിയൻ വൈസ് ചെയർമാൻ ആർ. ബാബുരാജ്, ക്ഷേത്രം തന്ത്രി അയ്യമ്പള്ളി എൻ.ജി. സത്യപാലൻ തന്ത്രികൾ, ക്ഷേത്രം മേൽശാന്തി ബെന്നി ശാന്തികൾ,​ ജില്ലയിലെ യൂണിയനുകളുടെ നേതാക്കന്മാർ,​ പോഷക സംഘടനാ നേതാക്കന്മാർ എന്നിവർ സംസാരിക്കും. യൂണിയൻ കൺവീനർ പി.ടി. ഷിബു സ്വാഗതവും ദേവസ്വം മാനേജർ കെ.കെ. മനോജ് നന്ദിയും പറയും.