തളിപ്പറമ്പ്: എം.ഡി.എം.എയുമായി കാറിൽ വരികയായിരുന്ന നാല് വടകര സ്വദേശികൾ തളിപ്പറമ്പിൽ പിടിയിലായി. കണ്ണൂർ റൂറൽ പൊലീസ് മേധാവി എം.ഹേമലതയുടെ മേൽനോട്ടത്തിൽ പ്രവർത്തിക്കുന്ന ഡാൻസാഫ് ടീമും തളിപ്പറമ്പ് എസ്.ഐ. ദനേശൻ കൊതേരി, എസ്.ഐ. കെ.വി.സതീശൻ എന്നിവരുടെ നേതൃത്വത്തിൽ തളിപ്പറമ്പ് പൊലീസുമാണ് ഇവരെ പിടികൂടിയത്. വടകര സ്വദേശികളായ നഫ്നാസ്, ഇസ്മായിൽ, ശരത്ത്, മുഹമ്മദ് ഷാനിൽ എന്നിവരാണ് പിടിയിലായത്. ഇവർ സഞ്ചരിച്ച സ്വിഫ്റ്റ് കാറും പൊലീസ് പിടിച്ചെടുത്തു. മന്നയിൽ സയ്യിദ് നഗർ അള്ളാംകുളം റോഡിൽ വച്ചാണ് ഇവർ പിടിയിലായത്. കാറിന്റെ ഹാന്റ് ബ്രേക്ക് ലിവറിന് താഴെ ഒളിപ്പിച്ചുവച്ച നിലയിലാണ് 30,000 രൂപ വിലവരുന്ന 11.507 ഗ്രാം എം.ഡി.എം.എ കണ്ടെടുത്തത്. റൂറൽ പൊലീസിന്റെ ലഹരിവിരുദ്ധ വിഭാഗമായ ഡാൻസാഫ് ടീം ഏറെ നാളായി ഇവരെ പിന്തുടർന്നുവരികയായിരുന്നു.